DILI, 29 MAIU 2026 – Sekretáriu Estadu Arte no Kultura (SEAK), Sua Exelénsia Jorge Soares Cristóvão, ohin akompaña ekipa téknika hodi aprezenta deseñu atu transforma Prizaun Aipelu ba Grupu Banku Mundiál Timor-Leste. Enkontru ne'e hala'o iha parseria ho reprezentante Banku Mundiál, Sr. David Freedman, iha Edifísiu SEAK, Praia dos Coqueiros, Dili.

Aprezentasaun ne'e foka ba oinsá atu jere no konserva Prizaun Aipelu nu'udar fatin memória istóriku no patrimóniu kulturál ne'ebé importante ba nasaun. Objetivu prinsipál mak atu hadi'a estrutura ne'ebé hetan estragu no transforma fatin ida-ne'e ba área turizmu kulturál no sentru edukasaun istóriku ba jerasaun foun sira.

Parseria ho Grupu Banku Mundiál ne'e hanesan pasu importante ida hodi buka apoiu tékniku no finanseiru ba dezenvolvimentu patrimóniu kulturál iha Timor-Leste. Transformasaun fatin istóriku ne'e sei lori benefísiu boot ba dezenvolvimentu turizmu kulturál no mós sai fatin edukasaun istóriku ba jerasaun foun sira.

Iha ninia diskursu, Sekretáriu Estadu Jorge Soares Cristóvão hateten: "Ami-nia kompromisu ba Prizaun Aipelu la'ós de'it atu hadi'a estrutura ne'ebé hetan estragu, maibé kona-ba oinsá ami bele prezerva duni ninia valór istóriku no identidade kulturál. Parseria ho Banku Mundiál ne'e sei hametin liután ami-nia planu atu transforma fatin ida-ne'e sai fatin turizmu no edukasaun ba joven sira iha futuru."

Ekipa téknika SEAK aprezenta detallu tékniku hotu-hotu ba reabilitasaun fatin ne'e, atu nune'e bele garante katak dezenvolvimentu sira iha futuru sei la lakon ninia autentisidade no valór istóriku.

Governu liuhusi SEAK kontinua komprometidu atu prezerva no dezenvolve patrimóniu kulturál nasionál nu'udar identidade no fonte edukasaun ba gerasaun tuir mai.

#MediaMjdak