DILI, 19 Maiu 2026 – Ministru Juventude, Desportu, Arte no Kultura (MJDAK), S.E. Nelyo Isaac Sarmento, ohin loron atribui premiu rekonesimentu ba atleta no ekipa tékniku sira ne'ebé hetan prestasaun diak iha SEA GAMES no ASEAN PARAGAMES Thailandia 2025. Aktividade ne'e hala'o iha Salaun Magna MJDAK, Dili, ho atmosfera solene ne'ebé hatudu apresiasaun boot husi estadu ba kontribuisaun atleta sira ba nasaun.

Atleta Prestasaun SEA GAMES Thailandia 2025

Modalidade Taekwondo:

Modalidade E-Sport:

Modalidade Boxe:

Atleta Prestasaun ASEAN PARAGAMES Thailandia 2025

Modalidade Atletizmu:

Modalidade Tenis Meza:

Iha diskursu, Ministru Nelyo subliña katak serimónia ida-ne'e la'ós de'it premiu maibé rekonesimentu ida ne'ebé estadu fó ba atleta sira ne'ebé hetan prestasaun iha nível internasionál. Nia hateten:

"Serimónia ida-ne'e la'ós premiu maibé rekonesimentu ida ita fo ba atleta sira ne'ebé mak hetan prestasaun iha nível internasionál. La'ós halo imi atu kontente deit, maibé hanesan responsabilidade ida atu imi hadomi nafatin modalidade ne'ebé imi treinu ba, hodi nafatin halo prestasaun diak ba ita-nia rai."

Ministru Nelyo mós explika katak premiu ne'e sai tardi tanba prosesu orsamentál, maibé Governu komprometidu atu fo apoiu ba atleta sira:

"Ida-ne'e hanesan rekonesimentu ida husi ita-nia estadu ba atleta Timor-oan sira ne'ebé hetan prestasaun iha nível internasionál ASEAN GAMES no ASEAN PARAGAMES ne'ebé iha fulan hira ba kotuk. Demora oituan tanba ita mós iha prosesu atu hasai orsamentu hodi fo ba atleta sira, kontribui ba ita-nia rai hodi foti ita-nia rai nia naran, estadu la matan dukur atu hare."

Iha oportunidade ne'e, Ministru Nelyo mós destaka mensajen ba atleta sira hotu kona-ba selebrasaun Loron Restaurasaun Independénsia ba dala 24:

"Aban ita sei selebra ita-nia Restaurasaun Independénsia ba dala 24. Ida-ne'e hanesan tinan ba ita hodi halo reflesaun, katak ha'u la'ós herói ka veteranu ida, maibé iha jerasaun ida ne'ebé ukun aan nian, ha'u iha responsabilidade hodi kontribui ba ha'u-nia nasaun husi meus saida deit. Tanba ne'e mak imi kontribui ona ba ita-nia nasaun liu husi modalidade desportu. Labele sente katak imi ema ketak ida iha kotuk, maibé imi-nia nasaun ne'e imi merese hodi kontribui liu husi imi-nia prestasaun."

Ministru Nelyo mós enkoraja atleta sira atu kontinua treinu no hadi'a prestasaun, hodi prepara an ba kompetisaun futuru no hasa'e naran Timor-Leste iha palku internasionál.

Serimónia entrega premiu ne'e sai hanesan simbolu apresiasaun estadu nian ba esforsu no dedikasaun atleta sira, no mós hanesan motivasaun ba jerasaun foun atu kontinua dezenvolve desportu iha Timor-Leste.

#MediaMjdak