HANOI, 13 Outubru 2025 – Timor-Leste, liuhosi Ministériu Juventude, Desportu, Arte no Kultura (MJDAK), partisipa ona iha Reuniaun Ofisiál Nivel Senior ASEAN kona-ba Desportu ba dala-16 (SOMS 16). Reuniaun ne'e hala'o iha Hanoi, Vietname, hahú husi loron 13 to'o 15 Outubru 2025.

Delegasaun husi Timor-Leste ne'e lidera husi Diretór-Jerál Desportu MJDAK, Sr. João Rodrigues, akompaña husi Asesór Relasaun Bilaterál, Sr. Gil da Costa.

Abertura no Foku Diskusaun

Ohin loron, 13 Outubru 2025, marka abertura ba loron dahuluk husi SOMS 16. Reuniaun ne'e, ho tema "Navigating Sports - Contributing to Sustainable Development" (Navega Desportu - Kontribui ba Dezenvolvimentu Sustentável), sei foka ba diskusaun importante sira kona-ba dezenvolvimentu desportu iha rejiaun.

Diskusaun importante sira inklui:

Dezenvolvimentu desportu profisionál hodi hasa’e kompetitivu rejionál. Promosaun ba igualdade jéneru no partisipasaun husi joven no ema ho defisiénsia.

Preservasaun no promosaun ba desportu tradisionál ne'ebé liga ho identidade kulturál ASEAN nian.

Estabelese Sentru Desportu Espesializadu ba Perfomansia Boot ASEAN (ASEAN High-Performance Sports Centre).

Timor-Leste nian Papél iha Kooperasaun Desportu ASEAN

Partisipasaun Timor-Leste nian iha SOMS 16, hamutuk ho nasaun membru ASEAN no parseiru sira hanesan Japaun no Xina, reflete kompromisu Governu atu integra-an iha inisiativa rejionál.

Reuniaun sira ne'e sei revê implementasaun husi Planu Traballu ASEAN kona-ba Desportu 2021–2025 no sei fó esbosu ba kuadru kooperasaun desportu ASEAN nian ba tinan 2025 ba oin. Ida ne'e hanesan oportunidade di'ak ba Timor-Leste atu kontribui no aprende husi esperiénsia rejionál.