COVALIMA, 6 Outubru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, lansa ona ofisiálmente eventu desportu rejionál Fronteira Cup 2025 iha Kampu Futebol Salele, Munisípiu Covalima.

Eventu boot ne'e envolve partisipasaun husi Munisípiu fronteira nian: Covalima, Bobonaru, no Rejiaun Autonómu Oé-Cusse Ambeno (RAEOA).

Pilár Tolu ba Fortifikasaun Sidadania

Ministru Nelyo Isaac Sarmento subliña katak Fronteira Cup 2025 ne'e la'ós de'it kompetisaun, maibé bazeia ba pontu importante tolu (3) ne'ebé ho objetivu atu fortifika sidadania iha área fronteira nian:

1. Desportu: Hodi dezenvolve talentu no promove saúde.
2. Kulturál: Hodi valoriza no promove identidade kulturál.
3. Rekonsiliasaun: Hodi hametin dame, amizade, no unidade.

Atleta Nu'udar "Odamatan" Fraternidade nian

Iha serimónia lansamentu ne'e, Ministru Nelyo Isaac Sarmento hato'o mensajen importante ida ba atleta no partisipante sira hotu.

Ministru subliña katak atleta sira husi Covalima, Bobonaru, no RAEOA nu'udar "odamatan" atu hatudu espíritu fraternidade, respeitu ba malu, no respeitu ba soberania nasionál.

"Atividade desportiva la'ós atu kria inimigu, maibé ita atu konese malu, halo belun barak liu tan, hodi fortifika fraternidade umana," Ministru Nelyo hateten.

Nia afirma katak Fronteira Cup sei kria estabilidade no dame iha liña fronteira, hodi sai nu'udar ezemplu ba Komunidade tomak.

Lansamentu ne'e marka duni komesa ba kompetisaun ne'ebé sei halibur no dezenvolve joven sira iha área fronteira nian liuhusi valór Desportu, Arte, no Kultura.

#MídiaMJDAK