DILI, 04 Agostu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin lidera serimónia hasa'e bandeira iha resintu MJDAK. Serimónia ne'e nu'udar espasu atu realsa unidade no kompromisu funsionáriu sira nian ba servisu.

Rekoñesimentu ba Susesu Nasionál

Iha serimónia ne’e, Ministru Nelyo Isaac hato'o ninia agradesimentu boot hosi laran ba funsionáriu sira hotu ba susesu boot ne'ebé konsege atinje durante organizasaun XII Jogos Desportivos CPLP 2025.

"Hau aprende buat barak ho imi, agradese ba imi hotu tanba ita susesu iha Jogu CPLP," dehan Ministru Nelyo Isaac, hodi rekoñese kontribuisaun boot husi kada funsionáriu iha eventu istóriku ne'e.

Hametin Disiplina no Kualidade Servisu

Hodi haree ba oin, Ministru Nelyo Isaac mós husu ba funsionáriu sira atu hametin liután disiplina, pontualidade, no kualidade servisu nian.

Atu hahú ho ida-ne'e, Ministru anunsia katak iha fulan oin mai, serimónia hasa'e bandeira sei hahú sedu liu, iha tuku 7:30 dadeer, atu reforsa kultura servisu ne'ebé metin.

MJDAK afirma kompromisu ba: "Mai ita serbisu hamutuk hodi lori futuru di'ak ba juventude no desportu Timor-Leste nian."

#MídiaMJDAK