DILI, 25 Setembru 2025 – Sua Exelénsia Prezidente Repúblika, Dr. José Ramos Horta, hala'o audiénsia ho Ministru Juventude, Desportu, Arte no Kultura (MJDAK), Nelyo Isaac Sarmento, iha Palásiu Prezidensia Repúblika, Aitarak-Laran. Enkontru ne'e foka ba asuntu preparasaun finál ba Dili International Marathon (DIM) 2025.

Hafoin reuniaun ne'e, Ministru Nelyo Isaac Sarmento informa ba públiku katak Dili International Marathon 2025 ne'e hanesan inisiativa husi S.E. Prezidente Repúblika, ne'ebé lori tema prinsipál: "Halai ba Palestina" (Run For Palestine).

Mensajen Páz no Diálogu

Objetivu husi tema ne'e mak atu hato'o Timor-Leste nia solidariedade ba vítima sira iha Gaza no fó mensajen boot ba mundu katak problema hotu-hotu tenke rezolve liuhusi dalan dame no diálogu.

"Ida ne'e hanesan oportunidade ida atu fó mensajen ba mundu katak, iha Timor-Leste, ami-nia vizaun katak problema hotu tenke rezolve liuhusi dalan dame no diálogu," Ministru Nelyo Isaac afirma.

Ministru mós subliña katak DIM ne'e iha ambitu ida atu promove Timor-Leste nia adezaun ba ASEAN, ne'ebé hanesan mós objetivu prinsipál husi Prezidente Repúblika.

Aktividade Multi-Setór Antes Jogu Halai

Ministru esplika katak eventu halai sei hala'o iha loron 11 Outubru, maibé atividade sira sei hahú kedas iha loron 9 to'o 11 Outubru. Aktividade antes marathon inklui:

• Programa Kulturál no Ezpozisaun: Fó oportunidade ba doadór sira atu halo sira-nia feira.
• Kompetisaun Kulinária ASEAN: Ho tema "Tein ba Páz" (Cooking for Peace), inklui tein gastronómia tradisionál.
• Promosaun Saúde no Desportu Tradisionál.

Kompetisaun halai ne’e rasik sei hahú iha loron 11 Outubru, tuku 05:00 OTL.

Ministru informa katak rejistrasaun kontinua loke ba modalidade sira hanesan Full Marathon 42 KM, Meia Marathon 21 KM, Paralímpiku 10 KM, no Halai Saudavél 3 KM.

Atividade DIM 2025 ne’e envolve kolaborasaun másivu hosi instituisaun governu seluk hanesan Ministériu Edukasaun (MENEC), Ministériu Saúde (MS), Ministériu Komérsiu no Indústria (MCI), Sekretaria Estadu Komunikasaun Sosiál (SEKOMS), PNTL, no F-FDTL.

 

#MídiaMJDAK