DILI, 29 JANEIRU 2026 – Ministru Juventude, Desportu, Arte no Kultura (MJDAK), Sua Eselênsia Nelyo Isaac Sarmento, ohin ofisializa abertura Kopa Juveníl Femenina Sub-15 iha Kampu Lecidere, Dili. Kompetisaun ne’e organiza husi Asosiasaun Futeból Dili Leste (AFDL).

Iha nia diskursu, S.E. Ministru Nelyo Isaac Sarmento (NIS) fó hanoin katak dezenvolvimentu futeból tenke la’o tuir sistema ne’ebé iha ona. Governante ne’e subliña importánsia husi knaar asosiasaun no klube sira nian nu’udar abut ba futeból nasionál.

"Ita-nia rai iha ona mekanizmu, ita iha Federasaun iha nível nasionál, maibé asosiasaun ho klube sira mak tenke serbisu maka’as iha kraik. Ha'u fó parabéns ba inisiativa AFDL nian ne’ebé dudu ita-nia foin-sa’e sira liuhosi kompetisaun feto nian ne'e," dehan Ministru MJDAK.

S.E. Ministru mós fó sai lia-fuan ksolok ba atleta sira katak Governu la taka matan ba sira-nia talentu. Iha loron 3 Fevereiru 2026, Governu sei inaugura ofisialmente fasilidade iha Sentru Akademia Futeból Becora, no iha tinan sira mai sei loke mós sentru akademia iha munisípiu sira seluk.

Bainhira entrevista ho média, Ministru Nelyo Isaac hatutan katak kompetisaun Sub-15 ne'e hanesan dalan atu prepara atleta feto sira. Nune'e, bainhira iha kompetisaun Liga Feto nian, klube sira bele haree no foti jogador sira ne'ebé joga di'ak hodi haforsa sira-nia ekipa.

Jogu ne’e sei hala’o to’o loron 10 Fevereiru 2026 no hetan partisipasaun husi klube 10:

1. ES. Paulo VI
2. Escola Kafe Dili
3. Tigre FC
4. ES. 5 de Maio Becora
5. ES. 12 de Novembro Becora
6. Leste United
7. Maranata FC
8. Academia Dili Leste A
9. Academia Dili Leste B
10. AD. SLB

#MídiaMJDAK