Dili, 08 Novembru 2025 – Komisun Nasionál Desportu (CND), nu'udar orgaun ligadu ba Ministériu Juventude, Desportu, Arte no Kultura (MJDAK), ohin realiza Programa Anti-Doping Education & Learning (ADEL). Formasaun ne'e hala'o iha Otél Ramelau, Dili, hodi fó edukasaun ba atleta hamutuk 54 husi modalidade lima.

Programa ADEL ne'e ho lema: "Empowering Timor-Leste Athletes to lead with integrity, fairness and excellence."

Garante Integridade Esportiva Nasionál

Atividade ne'e nu'udar pasu estratéjiku hodi prepara atleta sira-ne'ebé sei reprezenta Timor-Leste iha eventu boot internasionál, hanesan Sea Games Tailandia 2025.

Fasilitadora Programa, Sra. Kerry Gaillos, esplika katak objetivu prinsipál edukasaun ne’e mak atu garante atleta sira komprende didi'ak regra sira kona-ba substánsia ne'ebé bandu.

"Ami prezenta matéria atu atleta sira komprende kle'an hodi nune’e labele komete error ka viola regra anti-doping ne’ebé bandu husi World Anti-Doping Agency (WADA)," dehan Sra. Kerry Gaillos.

CND nia inisiativa ne'e importante tebes atu eleva estandarte desportu nasionál no garante katak partisipasaun Timor-Leste nian iha kompetisaun internasionál sei lós no livre husi kualkér pratika ilegál.

Modalidade Sira-ne'ebé Partisipa

Atleta sira-ne'ebé tuir formasaun ADEL ne'e mai husi modalidade tuir mai: Boxe, Futebol, Taekwondo, Karate-Do no Atletizmu

Tuir CND, modalidade sira-ne'e nu'udar prioridade hodi hetan apoiu tekniku no konesimentu kle'an molok hakat ba palcu desportivu rejionál.

#MídiaMJDAK