AINARO, 09 JUÑU 2026 – Ministériu Juventude, Desportu, Arte no Kultura (MJDAK), reprezenta husi Xefi Departamentu Dezenvolvimentu Infraestrutura (XDDI), Paulo Jorge Amaral, hasoru malu ho Diretor Edukasaun Munisípiu Ainaro (DEMA), Patrício da Costa Magno, hodi halo koordenasaun kona-ba rai ne'ebé atu entrega ba Governu hodi konstrui kampu multifunsaun iha Eskola Sekundária Tékniku Vokasional (GMOS), suku Ainaro, Munisípiu Ainaro.

Objetivu prinsipál husi vizita ne'e mak atu halo koordenasaun kona-ba rai no observa direta fatin ne'ebé atu konstrui kampu multifunsaun. XDDI Paulo Jorge husu ba diretora eskola no DEMA atu lori karta legal husi terras propriedade, atu sai hanesan baze legal bainhira entrega rai ba Governu liuhusi MJDAK antes konstrui kampu, hodi evita dezentendimentu kona-ba rai iha futuru.

Diretora Eskola Sekundária Tékniku Vokasional Gil da Costa Monteiro Oan Soru Ainaro (ESTV GMOS), Mariana Odede Soares de Araújo, iha ninia entrevista hatete katak nia sente orgullu no agradese ba Governu liuhusi MJDAK tanba mai observa direta rai ne'ebé estadu iha sira-nia eskola. Nia hatutan katak antes ne'e sira atu kria jogu amizade maibé la iha fatin ba sira.

"Ba daruak nafatin agradese ba MJDAK vizita ami. Nafatin husu aselera lalais hodi konstrui kampu ne'e, tanba ami iha estudante no juventude barak iha Ainaro ho talentu oioin atu treina, maibé fatin ba ami mak la iha," dehan Diretora Mariana.

Diretora garantia katak rai ne'e rai estadu no sira sukat ona dala rua, ho ema ida mak mai klaim kona-ba rai refere. Segundo faze, sira ba foti karta legal husi terras propriedade hodi entrega ba Diretor Edukasaun Munisípiu Ainaro, atu sai hanesan baze legal antes entrega rai refere ba Governu hodi hala'o dezenvolvimentu liuhusi área desportu.

MJDAK kontinua komprometidu atu garante dezenvolvimentu infraestrutura desportu iha munisípiu hotu, hodi apoia juventude sira atu dezenvolve talentu no partisipa iha atividade desportiva.

#MediaMjdak