DILI, 17 Jullu 2025 – Ajénsia públika TIC Timor I.P. hatudu ninia kompromisu hodi fó apoiu tekniku esensiál ba XII Jogos Desportivos da CPLP. Apoiu ne’e liuhusi fornesimentu liña internet estavel no servisu teknolojia informasaun iha Sentru Média (Media Center) CCD (Centro de Convenções de Díli).

Apoiu tekniku ne’e fasilita atividade lubuk ida, hanesan fornesimentu koneksaun internet ne’ebé ho kualidade no estabil atu garante jornalista sira bele halo transmisaun notisia hosi fatin ne’e ba mundu. Aleinde ida ne’e, TIC Timor mós asegura live-streaming hosi eventu ne’ebé hala’o iha Estadiu, Ginásiu Multiuso (GMT) no kampu Volley Praia, ne’ebé retransmite ona liu husi Rádiu Televizaun Timor-Leste (RTTL, E.P.).

Atu garante operasaun ne’e la’o ho di’ak, Ajénsia ne’e, hamutuk ho ninia Direção Servisu Infraestrutura Rede (DSIR), halo esforsu boot hodi halo monitorizasaun ba sistema durante oras 24 loron hitu (24/7). Esforsu ne’e ho objetivu atu asegura sinál internet sei la’o estavel to’o eventu internasionál ne’e hotu, hodi nune'e bele suporta servisu media, ofisiál, no atleta sira iha fatin ne’ebé de’it.

Suporte ne’e demonstra papél importante husi TIC Timor iha dezenvolvimentu infraestrutura dijitál no promosaun ba dezenvolvimentu desportivu iha Timor-Leste.

#MídiaMJDAK