MANATUTU, 25 Agostu 2025 – Ministériu Juventude, Desportu, Arte no Kultura (MJDAK), liuhosi Diretór Nasionál Patrimóniu, Loístika no Infraestrutura (DNPLI), Sr. Abel de J. Andrade, ohin hala'o enkontru konjunta ho kompañia seguransa Guardamor Central Hill, iha Salaun Estádiu Munisipál Manatutu. Enkontru ne'e ho objetivu atu halo supervizaun diretu ba progresu no kualidade servisu seguransa sira-nian iha munisípiu.

Responde ba Relatóriu Auditoria

Diretór Abel de J. Andrade subliña katak objetivu prinsipál husi vizita ne'e maka atu hatene progresu serbisu seguransa nian, liuliu atu responde ba relatóriu auditoria ne'ebé submete ona. Relatóriu ne'e hatudu katak iha munisípiu sira hanesan Manatutu, Baucau, Ermera, no Maliana, balu husi seguransa sira-nia farda, lanterna, no stick (paun de gás) sei falta, ne'ebé kontra ho akordu kontratu.

"Ami informa ona ba supervizór sira iha munisípiu atu tau atensaun ba sira-nia guarda sira tuir akordu ne'ebé iha entre Ministériu no parte Guardamor," Diretór Abel hateten. "Ami presiza hatene se sira tama serbisu tuir oras duni ka lae, tanba ne'e mak ohin ami mai direitamente atu haree asuntu sira-ne'e hodi foti solusaun."

Kompromisu ba Jestaun Patrimóniu

Enkontru ida-ne'e reflete MJDAK nia kompromisu forte atu mellora jestaun ba ninia patrimóniu no infraestrutura iha rai laran tomak. Asaun supervizaun diretu ne'e garante katak servisu ne'ebé fornese husi kompañia seguransa sira tuir duni kritériu ne'ebé determina hodi asegura seguransa ba fasilidade Estadu nian.

Enkontru ne'e partisipa mós husi Manager Guardamor, Venancio Freitas, Operasionál Guardamor, Abilio Belo, Supervizór Vicente Soares, Tékniku MJDAK, António Ximenes, Pontu Fokal MJDAK iha Manatutu, Joanita do Rosário, inklui mós Staff MJDAK, Silvina M. Luísa no Horácio da C. Martins.

#MídiaMJDAK