DILI, 01 JULLU 2026 – Ministério Juventude, Desportu, Arte no Kultura (MJDAK), liu husi Diresaun Geral Servisu Korporativu (DGSC) hamutuk ho Diresaun Nasional Património, Lojístika no Infraestrutura (DNPLI), realiza reuniaun ho kompania Rocky Construction, Lda, iha Salaun Magna MJDAK, Lesidere, Dili, atu finaliza obra Uma Nahe Bi’it Bo’ot no Kampu Multifunsaun Taibesi.

Diretor Geral Servisu Korporativu, João Dos Santos, esplika katak objetivu reuniaun ne’e mak atu informa ba Rocky Constructions, Lda kona-ba remata kontratu ba obra Uma Nahe Bi’it Bo’ot iha fulan Maiu 2026, no obra Kampu Multifunsaun Taibesi remata iha loron 25 Juñu 2026.

“Ohin MJDAK reúne ho kompania atu esplika prosesu hotu-hotu no prosedimentu ne’ebé tenke halo tuir. Karik kompania la bele halo tuir no kontinua obra, sira tenke halo karta deklarasaun ida ba S.E. Ministru. Karik kompania sei iha posibilidade atu kontinua, sira iha obrigasaun atu halo karta deklarasaun detalladu ho kalendáriu no prazu finalizasaun,” hatete João dos Santos.

Rezultadu husi reuniaun, kompania hatudu komitmentu atu finaliza konstrusaun Uma Nahe Bi’it Bo’ot, ho kondisaun tenke aprezenta karta deklarasaun detalladu inklui kalendáriu servisu. MJDAK fó prazu fulan rua (2) ba kompania atu finaliza obra ne’e, ho kompleta sasan mobiliáriu no AC.

Ba Kampu Multifunsaun Taibesi, MJDAK hamutuk ho kompania deside atu kontinua kontratu, ho obrigasaun ba kompania atu halo karta justifikasaun kompletu ba Ministru, tanba ne’e mak estensaun ba dala ha’at. Justifikasaun detalladu presiza hato’o hodi Ministru bele autoriza finalizasaun.

Diretor Geral avisa katak karik kompania la bele finaliza obra, sira tenke informa hodi Diresaun bele halo karta ba Ministru no hatun despachu atu para kontratu, tanba laiha kapasidade atu finaliza obra refere.

Reuniaun ne’e partisipa husi Asesor Jurídiku, Kordenador Aprovizionamentu MJDAK, Enjinheiru MJDAK, no Enjinheiru husi Rocky Constructions, Lda