DILI, 24 Outubru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin partisipa no halo abertura ofisiál ba akampamentu Lideransa Juventude, RYPEN-Timor-Lorosa'e (TL) 2025, ne'ebé ho tema sentrál "The Power of Influence" (Podér husi Influénsia).

Atividade ne'e hala'o iha edifísiu RYPEN-TL Lesibutak, Manleuana, Dili, no hahú hametin joven Timoroan sira hodi sai ajente transformasaun iha sira-nia komunidade.

Joven: Eroi Foun no Influensiadór Futuru

Iha nia diskursu, Ministru Nelyo Isaac Sarmento hato'o nia kontente tanba iha joven Timoroan sira-ne'ebé hahú prepara aan atu sai influensiadór ba futuru.

"Edukasaun ne'ebé aprende de'it iha eskola sei la to'o. Imi tenke buka aprende tan iha atividade extra sira atu bele kapasita imi nia aan atu sai Eroi foun ba imi nia nasaun no ba imi nia família," dehan Ministru Nelyo Isaac.

Governante ne'e realsa katak buat hotu ne'ebé joven sira kuda iha prosesu aprendizajen ne'e, sira sei ku'u iha loron ida. Nia mós husu ba joven sira atu kaer metin karáter Timoroan nian hodi hametin unidade ba malu, nu'udar baze importante ba dezenvolvimentu.

Preparasaun Juventude ba ASEAN

Ministru Nelyo Isaac mós foti kestaun importante kona-ba integrasaun rejionál:

"Dadaun ne'e ita tama ona ba membru ASEAN. Joven sira tenke prepara aan hodi bele kompete ho nasaun membru sira."

Mensajen ne'e hatudu vizaun MJDAK nian atu fó kapasitasaun ba juventude hodi sai kompetitivu no bele hatudu kualidade lideransa iha ámbitu rejionál.

RYPEN: Lideransa no Rezolusaun Problema

Diretór RYPEN-Timor-Lorosa'e, Sr. Reinaldo Carlos Correia, agradese ba apoiu másimu husi MJDAK ne'ebé posibilita realizasaun akampamentu ne'e. Akampamentu ne'e sei hala'o durante loron tolu, no estudante sira sei aprende kona-ba lian-na'in (komunikasaun), lideransa, no oinsá bele rezolve problema sosiál sira iha sosiedade.

Atividade ne'e partisipa husi estudante RYPEN no alumni sira inklui parseiru sira ne'ebé durante ne'e suporta RYPEN-TL nia atividade.

#MídiaMJDAK