DILI, 25 Jullu 2025 – Iha kalan ne'ebé nakonu ho amizade no selebrasaun, Delegasaun sira husi nasaun membru XII Jogos Desportivos da Komunidade ba País Lian Portugés (CPLP) 2025 hamutuk iha atividade Gala Dinner ida, ne'ebé hala'o iha Centro de Convenções de Díli (CCD).

Atividade ne'e fó oportunidade ba atleta, treinadór, ofisiál, no reprezentante sira husi CPLP atu deskansa husi kompetisaun intensa no halo ligasaun ho malu iha ambiente ne'ebé relaksadu no ksolok.

Gala Dinner ne'e hanesan komplementu ida ba espíritu "Unidus Nós Somos Um" (Unidu Ita Ida De'it), ne'ebé sai nu'udar lema ba Jogos CPLP 2025. Eventu ne'e hanesan meiu atu hametin amizade no kooperasaun entre povu CPLP nian liuhusi desportu no kultura.

Ministériu Juventude, Desportu, Arte no Kultura (MJDAK) nu'udar Komisaun Organizadora orgullu tebes atu sai uma-na'in ba eventu furak ida ne'e no simu delegasaun hotu iha Timor-Leste.

#MídiaMJDAK