DÍLI, 05 Marsu 2026 – Sekretáriu Estadu ba Arte no Kultura (SEAK), S.E. Jorge Soares Cristóvão, ohin hala’o enkontru ho Reprezentante Residente World Bank Group iha Timor-Leste, David Freedman, ne’ebé mós lidera programa International Finance Corporation (IFC), hodi diskute oportunidade kooperasaun ba dezenvolvimentu ekonomia kriativa iha setór arte no kultura.

Enkontru ne’e realiza iha edifísiu SEAK, Praia dos Coqueiros, Díli, no foka liu ba troka hanoin kona-ba estratéjia atu promove potensialidade setór kriativu iha Timor-Leste, liuliu iha área arte, kultura no indústria kriativa sira ne’ebé bele kontribui ba kresimentu ekonomia nasionál.

Iha biban ne’e, Sekretáriu Estadu Jorge Soares Cristóvão subliña katak Governu, liuhosi SEAK, kontinua buka oportunidade parseria ho instituisaun internasionál sira atu reforsa kapasidade setór kriativu, hametin inovasaun no kria oportunidade ekonomia ba artista no juventude sira iha rai-laran.

Iha sorin seluk, David Freedman hato’o katak World Bank Group no International Finance Corporation prontu kontinua esplora área kolaborasaun ho Governu Timor-Leste, liuliu iha promosaun investimentu no dezenvolvimentu setor kriativu ne’ebé bele kria valor ekonomiku no oportunidade servisu ba povu.

Enkontru ida-ne’e sai hanesan pasu inicial ida atu hametin relasaun kooperasaun entre SEAK no Grupu Banku Mundiál hodi suporta dezenvolvimentu ekonomia kriativu no kultura iha Timor-Leste.

#MídiaMJDAK