DILI, 8 Agostu 2025 – Ministériu Juventude, Desportu, Arte no Kultura (MJDAK), hamutuk ho parseru dezenvolvimentu World Vision Timor-Leste (WVTL), ohin realiza ona Simeira Juventude 2025 nian. Simeira ne’e hala’o iha Salaun Konferénsia Otél Tower Fatuhada, Dili, hodi marka abertura ba programa selebrasaun Loron Internasionál Juventude 2025.

Diretór Nasionál Dezenvolvimentu Juventude (DNDJ), Sr. Firmino Dias Quintas, hatete katak MJDAK sei realiza atividade lubuk ida hodi komemora Loron Mundiál Juventude nian, ne'ebé monu iha loron 12 Agostu.

Prioridade Simeira no Atividade Selebrasaun

Diretór Firmino akresenta katak Simeira Juventude 2025 nian foka liu ba asuntu importante sira hanesan Lideransa Juventude, Halo Mudansa, Hapara Violénsia Bazeia ba Jéneru (VBG), Protesaun Labarik, no Asaun Klimátika.

Nia realsa katak tema sentrál ba selebrasaun tinan ne'e maka: "Asaun Lokál ba Atinjimentu Objetivu Dezenvolvimentu Sustentável (ODS) iha Timor-Leste."

Atividade sira seluk ne'ebé sei implementa iha Loron Internasionál Juventude nian, hamutuk ho UNFPA inklui organizasaun sira seluk, mak hanesan: 11 Agostu 2025 (Kalan): Joven sira ne’ebé iha talentu, bele hatudu sira-nia abilidade iha resintu MJDAK. 12 Agostu 2025: Hala’o Marsa Saudável hahú husi Ministériu Negósiu Estranjeiru (MNEC) to’o resintu MJDAK.

Diretór DNDJ mós hateten katak joven sira ohin loron infrenta risku hanesan isin-rua sedu no moras HIV/SIDA. Tanba ne'e, instituisaun relevante sira halo dezeminasaun informasaun oioin ba joven sira atu bele evita aan husi risku sira-ne’e.

World Vision nia Komitmentu ba Karakter Juventude

Jerente Rekursu Umanu World Vision Timor-Leste, Sra. Junilda Maria Vilanova, hatete katak Simeira Juventude nian atu introdús ba foinsa’e sira kona-ba abilidade moris no harii sentidu ekipa.

Sra. Vilanova salienta katak sira-nia programa hanesan 'sidadania ativa' ka 'relasaun dame' tulun adolesente sira dezenvolve abilidade moris protesida, hodi sira bele sai dedikadu, responsavel, ho fiar, no integridade ne'ebé kontribui ba empregabilidade, emprezariedade sosiál, no lideransa. Ho rezultadu ne'ebé di'ak, adolesente sira ho idade 12-18 bele hetan tranzisaun ne'ebé di'ak ba períodu adultu nu'udar sidadania ativu.

Partisipante sira-ne'e mai husi estudante no grupu juventude sira, inklui: Komunidade Joven Ba Asaun Solidariedade (KJAS-FEG UNTL), Eskola Sekundária Anu’ur Dili, Eskola Sekundária FINANTIL, Eskola Sekundária 4 Setembru Balide Dili, Team Impact husi Aileu, Bobonaru, Baucau, Asosiasaun Defisiénsia Matan Timor-Leste, inklui INDICA, SEI, no PLAN.

#MídiaMJDAK