DÍLI, 11 Maiu 2026 (GCI-MJDAK) — Sua Exelénsia Ministru Juventude, Desportu, Arte no Kultura, Sr. Nelyo Isaac Sarmento, akompaña husi Diretór Jerál Desportu, Sr. David Tomas de Deus, simu audiénsia husi Prezidente Federasaun Taekwondo Timor-Leste, Sr. Gil Alves Fernandes, hamutuk ho atleta nasionál na’in neen husi Dojan Koni iha Salaun Magna MJDAK, Lecidere, segunda-feira ne’e.

Enkontru ne’e ho objetivu atu informa ba Governu kona-ba preparasaun no partisipasaun atleta nasionál sira iha Kampionatu Nasionál Mongólia ne’ebé sei hala’o iha semana oin. Atleta sira sei kompete iha modalidade rua, mak hanesan Poomsae no Kyorugi, nu’udar parte husi kampaña atu hasa’e esperiénsia no prestasaun hodi prepara-an ba Asian Games iha Japaun no SEA Games 2027.

“Ohin ita simu vizita husi Dojan Taekwondo tanba sira atu ba partisipa iha kampionatu iha Mongólia. Ida-ne’e hola parte mós hanesan foti sira-nia valór partisipasaun nian hodi bele kompete iha Asian Games. Ita espera katak ho preparasaun ne’ebé hahú ona dezde fulan-Janeiru, sira bele aumenta esperiénsia tanba depois de jogu ida-ne’e, sira sei iha tan jogu rua iha Koreia no Pakistán,” dehan Sua Exelénsia Ministru Nelyo Isaac Sarmento.

Ministru mós subliña katak preparasaun atleta nasionál iha modalidade Poomsae ho Kyorugi hatudu progresu ne’ebé di’ak. Governu fiar katak liuhusi fokus iha treinu no orientasaun husi treinadór sira, atleta sira bele lori rezultadu ne’ebé di’ak ba nasaun.

Iha biban ne’e, Sua Exelénsia Ministru Nelyo Isaac Sarmento fó motivasaun ba atleta sira hodi hatudu prestasaun máksimu no kontinua treinu wainhira fila mai Timor-Leste. Governu konsidera katak atleta nasionál Taekwondo sira merese hetan investimentu kontinuu hodi dudu prestasaun desportu nasionál nian ba oin.

Partisipa mós iha audiénsia ne’e, Xefe Gabinete MJDAK, Sr. Egas Barros Guterres Godinho, hamutuk ho ekipa treinadór no atleta sira ne’ebé sei reprezenta Timor-Leste.