COVALIMA, 8 Outubru 2025 – Ho inisiativa ne'ebé ho sentidu boot ba dame no unidade, delegasaun husi Nusa Tenggara Timur (NTT), Indonézia, no ekipa Sekretaria Estadu Arte no Kultura (SEAK)  hamutuk Sentru Nasionál Chega (CNC) realiza ona atividade signifikativa ba Rekonsiliasaun iha Munisípiu Covalima.

Atividade ne'e hala'o iha loron 8 Outubru 2025, nu'udar parte husi esforsu kontínuu atu hametin relasaun amizade no hadi'a pasadu entre Timor-Leste no Timor Osidentál.

Misa Agradesimentu no Homenajen

Serimónia ne'e hahú ho Misa Agradesimentu ne'ebé hala'o iha Parókia Ave Maria Suai, Covalima. Misa ne'e prezide husi Amu Selebrante Padre Jovito Rêgo de Jesus Araújo no Padre Aderito Da Costa Bilar Vieira Moreira.

Hafoin Misa, delegasaun sira kontinua ho Marsa Rekonsiliasaun hodi tau ai-funan iha Monumentu Masakre Setembru Negro 1999 nian. Homenajen ne'e hatudu duni respeitu no rekoñesimentu ba pasadu, hodi hanoin-hikas vítima sira no kompromisu atu haree ba futuru ne'ebé hakmatek.

Símbolu Fatuk Inan ba Unidade

Iha serimónia ne'e, hala'o mós hatur Símbolu Fatuk Inan ida ne'ebé ho sentidu maka'as ba: Unidade, Amizade, no Rekonsiliasaun entre povu Timor-Leste no Timor Osidentál.

Atividade Rekonsiliasaun ne'e, ne'ebé akontese iha ámbitu Festival Fronteira Kulturál, hatudu katak kooperasaun la'ós de'it kona-ba selebrasaun, maibé mós sai nu'udar espasu esensiál atu habelun, hadia pasadu, no haree ba futuru komún ne'ebé nakonu ho dame no estabilidade.

MJDAK, liuhusi SEAK-CNC, komprometidu atu kontinua promove diálogu kulturál no pás hodi hametin relasaun ho parseiru iha fronteira.