DILI, 22 Outubru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin partisipa iha Sorumutu Konsellu Ministrus (KM) ne'ebé hala’o iha Palásiu Governu, Dili. KM delibera no aprova projetu lejizlativa sira-ne’ebé kobre área importante hanesan protesaun sosiál, edukasaun, telekomunikasaun, no prezervasaun ambientál.

1. Kria Liña Solidária ba Vítima Violénsia

KM aprova Projetu Dekretu-Lei, ne’ebé aprezenta husi Vise-Ministra Solidariedade Sosiál no Inkluzaun, Céu Brites, hodi kria Liña Solidária atu atende kazu violénsia bazeia ba jéneru no violénsia hasoru labarik no foinsa’e sira.

Objetivu: Fornese servisu gratuitu, konfidensiál, no disponivel oras 24 nia laran hodi garante vítima sira asesu ba apoiu.

Númeru Úniku: 116 sei asesível husi kualkér rede telekomunikasaun nian, hodi permite enkamiñamentu lalais kazu sira.

2. Kooperasaun Setór Telekomunikasoins ho Malázia

KM autoriza Ministru Transportes no Komunikasoins, Miguel Marques Gonçalves Manetelu, asina Memorandu Entendimentu (ME) ho Governu Malázia kona-ba kooperasaun iha ámbitu telekomunikasoins, hodi kontribui ba dezenvolvimentu setór ne'ebé modernu no efisiente, nu'udar parte importante ba integrasaun rejionál iha espasu ASEAN.

3. Rejime Exepsionál ba Promosaun Dosente

KM aprova Projetu Dekretu-Lei kona-ba Rejime Exepsionál ba Promosaun Bazeia ba Antiguidade hosi Funsionáriu sira ne’ebé Integra iha Karreira Dosente. Ida ne'e hodi rekoñese kontribuisaun husi profesór rihun ida liu, ne’ebé besik atu reforma.

4. Konsagrasaun Loron Nasionál Tasi

Ikusliu, KM aprova Projetu Rezolusaun Governu, ne’ebé aprezenta husi Primeiru-Ministru Kay Rala Xanana Gusmão, kona-ba konsagrasaun loron 5 Juñu nu’udar Loron Nasionál Tasi.

Objetivu: Selebrasaun no prezervasaun tasi no biodiversidade, hodi reforsa kompromisu Governu nian ba implementasaun Polítika no Planu Asaun ba Promosaun Ekonomia Marítima ida ne’ebé Reziliente no Sustentável 2025-2035.

Rezolusaun ne’e estabelese mós katak selebrasaun Loron Nasionál Tasi sei hala’o tinan-tinan ho rejime rotasaun entre Munisípiu sira, ho envolvimentu ativa husi labarik no foinsa’e sira.

#MídiaMJDAK