Díli, 27 Fevereiru 2026 – Ministériu Juventude, Desportu, Arte no Kultura (MJDAK), Sua Exelénsia Ministru Nelyo Isaac Sarmento, akompaña husi Diretór Jerál Desportu, João M. Rodrigues, realiza reuniaun kordenasaun ho Komite Paralimpiku Timor-Leste (CPNTL), ne’ebé reprezenta husi Prezidenti Interinu, Joãzinho Pereira, no Konfederasaun Desportu Timor-Leste (CDTL), ne’ebé lidera husi Prezidenti Afranio Xavier. Enkontru ne’e hala’o iha Salaun Magna MJDAK, Lecidere, Díli.

Tuir Diretór Jerál Desportu, objetivu husi reuniaun ne’e mak atu hametin kordenasaun institusionál entre Governu no organizasaun desportiva sira, liuhusi diskusaun no preparasaun ba realizasaun Festival Nasionál Desportu (FND). Inisiativa ida ne’e direciona atu identifika no dezenvolve atleta potensial sira, hodi prepara sira ba kompetisaun internasionál, inklui Southeast Asian Games (SEA Games) no Asian Games.

“Reuniaun ohin loron hanesan etapa importante ida atu aliña planu no estratéjia preparasaun. Liuhusi FND, ita hakarak identifika atleta potensial sira hodi bele dezenvolve no hasa’e sira nia kapasidade, atu prontu kompete iha SEA Games no Asian Games. Preparasaun sei realiza durante fulan tolu to’o haat antes partisipa iha kompetisaun,” hatete Diretór Jerál Desportu.

Iha reuniaun ne’e mós diskute kona-ba importánsia promove desportu inkluzivu iha Timor-Leste. Governu, liuhusi MJDAK, hamutuk ho CPNTL no CDTL, komprimete atu hametin servisu kordenasaun ho asosiasaun no federasaun relevante sira, inklui ADTL, hodi garante identifikasaun atleta sira ho potensial iha área desportu federadu no paralimpiku, no fó oportunidade atu hatudu sira nia desempeñu.

Partisipa iha reuniaun ne’e mak Xefe Gabineti MJDAK, Egas Baros Guterres Godinho; Diretór Nasionál Desportu Federadu, Oscar Dias Quintas; staff tékniku MJDAK; no mós reprezentante sira husi CPNTL no CDTL.