Dili, 24 Novembru 2025 – Diretór Jerál Desportu (DJD) husi Ministériu Juventude, Desportu, Arte no Kultura (MJDAK), João M. Rodrigues, hala’o enkontru tekniku ida ho Koordendor Tekniku Jogu Basketból, Klube Desportu sira, no Árbitru sira hodi finaliza preparasaun ba jogu MJDAK Cup 2025. Atividade importante ne’e hala’o iha Salaun Magna MJDAK, Lecidere, Dili.

FOKUS BA ÉTIKA NO SANSAUN KLARU

Objetivu prinsipál husi enkontru ne’e mak atu diskute no hametin kestaun sira kona-ba regras jogu, sansaun, no rekezitus partisipasaun nian hodi garante kompetisaun ne’ebé di’ak no disiplinadu.

DJD, João M. Rodrigues, subliña katak objetivu boot liu husi MJDAK Cup mak atu mantein Jogu Limpu (Fair Play):

João M. Rodrigues (DJD): "Iha ambitu realizasaun MJDAK Cup tinan ne’e, ami hakarak mantein primeiru: Jogu Limpu, katak Klube sira tenke hatudu etika desportiva ne’ebé di’ak durante jogu. Iha enkontru ne’e ami mós klarifika regras sira seluk hanesan sansaun no rekezitus. Rekezitus prinsipál mak idade husi 17 anos ba leten maka bele partisipa."

DJD mós afirma katak ba asuntu disiplina, Komisaun sei la tolera tarde. Klube sira ne'ebé kumpri la tuir oráriu jogu sei hetan sansaun ka WO (Walk Over), hodi hasai husi kompetisaun.

KLUBE HAMUTUK 12 KOMPETE

Tuir Koordendor Tekniku Jogu Basketból José Julio, esklarese katak iha Klube hamutuk sanulu resin-rua (12) mak sei partisipa iha jogu MJDAK Cup tinan ne’e.

Data Abertura: Atividade abertura sei hahú iha loron 29 fulan-Novembru tinan ne’e. Fatin: Jogu sei hala'o iha Jináziu Desportu Dili (GDD).

Enkontru ne'e partisipa husi reprezentante Klube idak-idak, Árbitru sira, Koordendor Tekniku Jogu Basketból nian, no Staff tékniku husi MJDAC. Kompromisu ne'e nu’udar pasu importante hodi asegura susesu no kualidade ba kompetisaun Basketból MJDAK Cup 2025.

#MídiaMJDAK