DÍLI, 26 Fevereiru 2026 — Ministru Juventude, Desportu, Arte no Kultura (MJDAK), Nelyo Isaac Sarmento, hamutuk ho Federasaun Nasionál Basketból Timor-Leste (FNBTL), realiza enkontru hodi diskute planu atu reativa kompetisaun Liga Basketból iha rai-laran. Enkontru ne’e hala’o iha Salaun Magna MJDAK, Lecidere, Díli.

Iha ninia intervensaun, Ministru Nelyo Isaac hatete katak atividade basketból paradu ona durante tempu naruk, tan ne’e Governu hakarak hamutuk ho federasaun atu hader fali modalidade ida-ne’e liuhosi organizasaun liga nasionál, ho objetivu prepara atleta sira ba kompetisaun iha futuru.

Diskusaun ne’e foka ba pontu estratéjiku sira hanesan tuir mai:

Liga ba Feto no Mane: Governu no FNBTL konkorda atu promove kompetisaun liga ba ekipa feto no mane hodi garante inkluzaun no dezenvolvimentu atléta sira iha nivel nasionál.

Kalendáriu Implementasaun: Se preparasaun téknika la’o di’ak, liga ne’e planeadu atu hahú iha fulan-Abril, hafoin selebrasaun Páskoa.

Formasaun Treinadór: Molok liga hahú, presiza realiza formasaun ba treinadór sira atu asegura kualidade preparasaun no jestaun ekipa.

Dezenvolvimentu Modalidade Popular: Governu rekoñese katak basketból sai modalidade ida ne’ebé popular iha joventude, tan ne’e presiza atividade regulár atu dezenvolve talentu nasionál.

“Ohin ita hamutuk hodi diskute aspetu tékniku sira. Governu hakarak federasaun hader fali tanba tinan ida ne’e liga tenke realiza. Se bele hahú iha fulan-Abril ka lae, ne’e depende ba prontidaun ekipa tékniku,” dehan Ministru Nelyo Isaac.

Enkontru ne’e konta ho partisipasaun husi Diretór Jerál Desportu, João M. Rodrigues, Prezidente em ezersísiu FNBTL, Madalena Carlos Pereira, kargu xefia MJDAK, no ekipa tékniku husi federasaun.

Inisiativa ida-ne’e demonstra komitmentu Governu atu promove desportu nasionál, hodi kria oportunidade ba joventude no hasa’e prestasaun basketból Timor-Leste iha nivel rejionál no internasionál.

#MídiaMJDAK