COVALIMA, 4 Outubru 2025 – Ho antuziazmu boot husi autoridade lokál no komunidade, Postu Administrativu Tilomar, Munisípiu Covalima, konfirma ona ninia prontidaun atu simu modalidade Futebol ba eventu desportu rejionál Fronteira Cup 2025.

Administradór Postu Tilomar, Sr. Venâncio Sarmento, hato'o konfirmasaun ne'e, subliña katak Kampu Futebol Salele prontu ona atu uza ba jogu, ne'ebé sei hahú iha loron Tersa, 7 Outubru 2025.

Pontu Istóriku ba Tilomar

Fronteira Cup ne'e ho objetivu atu kria amizade no hametin relasaun entre Munisípiu fronteira nian: Covalima, Bobonaru, no Rejiaun Autonómu Oé-Cusse Ambeno (RAEOA).

Ida-ne'e hanesan primeira vez katak eventu desportu boot nasionál ho karáter rejionál hala'o iha Tilomar, nu'udar fatin ne'ebé iha poténsia ba dezenvolvimentu desportu baze.

Apelu ba Matan Ba Futuru

Maski Kampu Salele prontu atu uza, autoridade lokál sira aproveita oportunidade ne'e hodi hato'o apelu ba Ministériu Juventude, Desportu, Arte no Kultura (MJDAK).

Administradór husu ba MJDAK atu tau matan no aloka fundu ba melloria ka dezenvolvimentu Kampu Futebol Salele ba futuru. Investimentu iha infraestrutura desportiva hanesan ne'e importante tebes atu fasilita joven sira iha área remotas atu dezenvolve sira-nia poténsia iha desportu.

MJDAK agradese ba kompromisu no serbisu maka'as husi Autoridade Postu Tilomar no komunidade atu asegura susesu ba Fronteira Cup 2025, hodi fó oportunidade ba atleta sira iha fronteira atu kompete no kria amizade.

#MídiaMJDAK