DILI, 17 Agostu 2026, GKI---Reprezentante foinsae husi Parokia Igreja Katolika iha Timor Lorosae, halibur-an iha Parokia Remexio, Postu Remexio, Munisipiu Aileu hodi partisipa atividades Jornada Nasional Juventude (JNJ) 2026 nian.

Atividades JNJ durante loron lima  ne’e, hahu loron 17-21 Agostu 2026, ho Tema Hader Ba. Tema JNJ ne’e, Dom Virgilio Cardeal do Carmo mak hili hodi konvida foinsae Katolika hotu hader ba Igreja Katolika hodi hametin fiar ba Maromak.

Padre  Francisco Indra do Nascimento Tey Seran no Florindo Napoleão dos Santos  abertura  JNJ iha Parokia São José Operario Remexio, Segunda (17/08).  

Reprezentante Ministériu Juventude, Desportu, Arte no Kultura (MJDAK), Florindo Napoleão dos Santos  hatete, programa JNJ ne’e importante tebes ba joven sira tanba joven iha aspetu tolu mak joven ba Uma Kreda,   Nasaun no  ba Uma Lisan.

“Lori Ministériu nia naran,  hato’o ba itaboot sira, programa  ne’e di’ak tebes ba alin sira nu’udar joven tenki iha espiritu korajen nafatin. Tanba joven iha aspetu tolu mak joven ba Uma Kreda,  Nasaun no  joven ba Uma Lisan. Nune’e liu husi atividade sira ne’e balu sei hetan vokasaun hodi serví uma kreda.  Durante aprende loron lima nia laran bazeia ba tema jerál “Hader Ba” ida ne’e atu halo itaboot sira bele reflete itaboot sira nia an haforsa imi nia an no mós imi nia klamar. Imi tenki halo mudansa ba imi nia an tanba imi nia prezensa importante ba nasaun joven tenki matenek, kompetetivu no orgullu nu’udar timor oan buka aprende,” dehan Florindo.

Florindo informa, Governu liu husi MJDAK iha komitementu nafatin hodi apoiu ba iha programa Konsellu Nasionál Juventude Katolika Timor-Leste (CNJCTL) atu hetan kapasitasaun no formasaun oi-oin ba organizasaun hotu-hotu nia iniasiativu di’ak ba juventude sira.

 Atividade Jornada Nasionál Juventude iha postu Remexiu hahú ho misa agradesimentu ne’ebé prezide husi Pe. Francisco Indra do Nascimento Tey Seran no hetan partisipasaun maximu husi juventude parokia tolu hanesan, Baucau, Dili no Maliana hamutuk ho sarani no Inan Aman, Xefí Suku, Xefí Aldeia no mós Autoridade Postu Remexiu Amu Parokia Remexiu, Padré no Madré sira. Atividade ne’e realiza tanba hetan apoiu fundus USD 17.000.00  husi MJDAK.  #MédiaMjdak