Dili, 03 Jullu 2026 – Ministériu Juventude, Desportu, Arte no Kultura (MJDAK), liu husi Diretór Jeral Servisu Korporativu (DGSK), João dos Santos, hamutuk ho Diretór Jeral Juventude, formaliza nota intendimentu entre Plan Internasional Timor-Leste ho MJDAK. Serimónia asinatura realiza iha Salaun Ema ho Defisiénsia, Lecidere, Dili.

Diretór Jeral Servisu Korporativu (DGSK) MJDAK, João dos Santos, hatete katak formalizasaun akordu servisu hamutuk ne'e atu intende malu ba atividade sira ne'ebé Plan Internasional Timor-Leste hala'o tiha ona hamutuk ho diresaun jeral juventude.

Nia esplika katak MJDAK ho Plan Internasional la'o hamutuk hela, liu-liu ba munisípiu ha'at ne'ebé Plan nia baze. Maske Plan nia baze seidauk abranje ba munisípiu hotu-hotu, pelumenus munisípiu ha'at ne'ebé agora dadun iha mudansa no balu presiza anota, no governu mós la taka matan ba ida ne'e.

"Tanba ida ne'e mak ohin loron parte MJDAK ho Plan Internasional Timor-Leste atu formaliza nota intendimentu ne'e, atu nune'e atividade sira la'ós de'it hakbiit foinsa'e nian, maibé mós desportu, kriatividade, arte no kultura. Ida ne'e mos presiza ba oin, liu-liu ba munisípiu ha'at ne'e atu koopera malu hodi realiza," dehan João dos Santos.

Nia mós hateten katak karik Plan Internasional Timor-Leste iha orsamentu sufisiente hodi hala'o, entaun diresaun relevante sira iha MJDAK koordena malu atu nune'e bele alkansa liu-liu ba Planu Asaun Nasionál Juventude ne'ebé trasa ona to'o 2027.

Agora dadaun, governu elabora hela planu médiu prazu hahu husi 2027 to'o 2030, foka liu ba pilar sosial hodi kapasita rekursu umanu, atu nune'e bele asesu ba fundu ruma atu kontribui ba diversifikasaun ekonomia nian.

João dos Santos mós informa katak programa foun ida mak MJDAK submete ona ba Ministériu Finansas, programa emprendedorismu ba foinsa'e sira. Ne'e kontinuasaun husi atividade ne'ebé SEJD hala'o tiha ona antes sai MJDAK. Agora dadaun, MJDAK halo meios oin seluk atu dezenvolve programa ne'e.

"Bainhira ita fo fundu ki'ik liu maka 500,000 Mil, atu jere ne'e mak iha problema, tanba parseiru ho governu seidauk prepara diak foinsa'e sira atu nune'e jere ho didiak," dehan nia.

Iha governu anterior, programa emprendedorismu sosial ne'e parte SEJD la fó pursentu 100, tanba atividade estimulu ne'e signifika katak grupu ne'e eziste ona no la'o tiha ona, no agora fo fundu atu nune'e bele espande liu tan ka jere diak liu tan. Maibé atu halo monitoring, eru barak mak mosu iha terenu, entaun nia pursentu ne'e mak tun makas.

Iha fatin hanesan, Country Director Plan Internasional Timor-Leste, Fátima Estrela Soares, hatete katak momentu ida ne'e krusial teb-tebes ba Plan Internasional Timor-Leste, tanba servisu ho juventude la'ós foin hahu.

"Ohin ne'e momentu ida ne'ebé esensial tebes ba Plan Internasional Timor-Leste. Ami hakarak formaliza servisu ne'ebé mak iha parte responsabilidade ba servisu ne'ebé Plan halo ba juventude sira," dehan Fátima Estrela Soares.

Nia esplika katak iha Plan nia planu estratéjia tinan lima ba kotuk, servisu hahu ona ho juventude sira, maibé ho numeru ne'ebé ki'ik tebes. Iha fulan Outubru tinan 2025, Plan lansa ona planu estratéjia ba tinan lima oin mai to'o 2030.

"Plan Internasional hakarak servisu hamutuk ho MJDAK atu servisu ho juventude sira, inklui parseiru sira, atu sa'e ba iha pursentu husi 14 to'o 70," dehan nia.

Agora dadaun, Plan servisu hamutuk ho grupu 20 ne'ebé servisu iha área oioin, hanesan: Juventude, Agrikultura no ortikultura, Be'e mos no resiklazen, Mudansa klimátika, Saúde reprodutiva, Haforsa lideransa no sira seluk-seluk tan

"Ohin loron ne'e ita formaliza akordu servisu hamutuk, hodi bele hare katak kada tinan ne'e saida mak Plan bele halo, no parte governu liu husi MJDAK bele halo hodi kontribui ba planu asaun anual ne'ebé iha no MJDAK rasik. Organizasaun sira atu bele kontribui hodi responde ba servisu hamutuk planu asaun anual ne'ebé iha," dehan nia.

Nia mós hatete katak ida ne'e mak sira hakarak halo no servisu ida ne'e ba kompromisu ba parte rua ne'ebé iha ona pozitivu hodi hakat ba oin. Konfiansa ba parseiru ida ne'e no fiar loos katak sei dezenvolve atividade estratéjika ba oin, atu nune'e hare ba tinan ida ne'e saida mak bele halo no kontinua ba tinan sira tuir mai.

Partisipa iha serimónia ne'e mak Diretór Jeral Servisu Korporativu (DGSK) MJDAK, João dos Santos; Country Director Plan Internasional Timor-Leste, Fátima Estrela Soares; no ekipa husi MJDAK no Plan Internasional Timor-Leste.

#MediaMjdak