DILI – Primeiru-Ministru, Xanana Gusmão, konsidera katak futuru Timor-Leste nian iha labarik sira-nia liman. Iha inagurasaun Sentru Desportivu Amizade Koreia-TL iha Becora, Líder Nasionál ne'e hateten katak desportu la’ós de’it atu buka manán ka lakon, maibé sai fatin importante hodi forma karákter labarik sira nian atu sai sidadaun ne’ebé di’ak.

Xanana Gusmão husu ba autoridade lokál no komunidade iha Suku Becora atu kuidadu didi’ak fasilidade foun ne’e. Tanba sentru ne’e nia moru balun badak, Primeiru-Ministru husu autoridade sira atu kontrola foin-sa’e sira hodi labele haksoit estraga fasilidade ne’ebé iha.

Iha biban ne'e, Xefe Governu fó apresiasaun boot ba Mister Kim Shin-hwan, eis-treinadór selesaun nasionál husi Koreia Súl ne’ebé hela ona iha Timor-Leste durante tinan 20. Xanana Gusmão rekoñese Mister Kim nia espíritu solidariedade tanba dedika an hodi treina labarik sira, inklui lori ekipa U-12 manán Kopa MBC iha Koreia iha tinan 2004 no 2005.

Ho prezensa kampu foun ho padraun internasionál ne’e, Primeiru-Ministru hein katak Ministériu Juventude, Desportu, Arte no Kultura (MJDAK) bele dudu programa sira ne’ebé foka liu ba eduka foin-sa’e sira-nia talentu no disiplina. Xanana Gusmão mós hato’o obrigadu ba Koreia Súl ne’ebé kontinua simu Timoroan sira hodi ba serbisu iha ne’ebá.

Sentru desportivu foun ne'e ekipadu ho kampu futeból laran (aula) no espasu ba komunidade ne’ebé bele akumula ema na’in rihun ida resin. Fatin ne'e sai ona ezemplu dahuluk ba dezenvolvimentu fasilidade desportu ne'ebé di'ak ba komunidade iha Timor-Leste.

#MídiaMJDAK