UATULARI, 09 Setembru 2026, GKI---Ekipa Media Ministeriu Juventude Desportu Arte no Kultura (Mediamjdak), halo profile video dokumentariu  atividades formasaun Lian Ingles no Komputador Asosiasaun Leonel Treining Center (LTC) iha Suku Afaloikai, Postu Uatulari, Munisipiu Vikeke.

Jestor LTC sira realiza atividades formasaun Lian Ingles no Komputador, mos fo formasaun ba foinsae oinsa utiliza teknolojia konaba dijital literasia no artifisial intelijensia (AI).

Jestor Centro Leonel Training Center (LTC), Natalino Soares Sarmento esplika,  ezistensia Grupu Leonel Training Center harii ho objetivu ida atu fo kapasitasaun ba foinsa'e sira liu-liu iha lian ingles, komputador, lideransa, no dijital literasi inklui mós Artificial Intelijensia.

"LTC, hahu formasaun iha 2023 ho klase komputador. Ami haree katak foinsa'e sira preziza mós hasa'e sira nia abilidade iha lingua nian nune'e ami bolu malu aumenta tan formasaun ba lian ingles inklui mós public speaking no leader ship, dijital literasi foku liu iha Artificial Intelijensia (AI) no Canva dezain atu sai hanesan bukae Ida ba ami nia joven sira liu-liu Postu Uatulari atu bele hasoru mundu desenvolvimentu teknolojia ida ohin loron hodi bele kompete iha merkadu traballu,” Natalino esplika.

Maske LTC halao atividades formasaun ne’e, ho fundus finansial limitadu maibe Natalino informa, jestor LTC konsege estabelese ona ramu nen (6) iha area Postu Uatulari nian. Ramu LTC nen (6), kompostu husi Ramu Uatulari Antigu, Borsoba,  Alimbata, Uaitame, Makadiki,  Darebai no Kampo Baru nudar sentru.

LTC hetan fundus orsamentu dolar amerika rihun rua resin atus lima ($2,500) husi MJDAK, iha tinan 2025, wainhira partisipa seremonia selebrasaun Loron Nasional Juventude Timor Leste iha Kapital Munisipiu Aileu. Kategoria orsamentu apoiu inisiativu ne’e koloka iha Gabinete Ministru Juventude Desportu Arte no Kultura nian.

Objetivu estabelese LTC ne’e, tuir Natalino,  mak hakarak lori foinsa'e Uatulari oan bele hasa'e kuñesimentu iha lian ingles no prepara ba futuru. 

Natalino  hato'o agradese wa'in ba iha Programa Empoderamento Juventude Inovativu ba Mudansa (PEJI-M) ne'ebé apoiu mós Grupo LTC nia atividade. Partisipa iha formasaun ne'e mai husi foinsa'e Suku Afaloicai, Uaitame.

Atu sintoniza kompletu lalaok LTC nian, mediamjdak, sei publika kompletu iha Youtube mjdac, tuir mai.  #MédiaMjdak#