MANATUTU, 18 Agostu 2025 – Ajénsia Dezenvolvimentu Nasionál, Institutu Públiku (ADN.IP), hamutuk ho Diresaun Nasionál Patrimóniu, Loístika no Infraestrutura (DNPLI) husi Ministériu Juventude, Desportu, Arte no Kultura (MJDAK), ohin hala'o inspesaun ba pagamentu nú. 4 ba konstrusaun Estadiu Munisipál Manatutu. Obra ne'e hala'o husi kompañia Viqueque-Zumalai (VIKZUM. Unip. Lda.).

Inspesaun konjunta ne'e nota katak progresu konstrusaun ba Estadiu Manatutu atinje ona 95%. Maibé, relatóriu tékniku hatudu katak iha item balun ne'ebé kompañia seidauk finaliza, hanesan montajen ahi iha li'ur estádiu, kanalizasaun bee, no item seluk ne'ebé presiza atu remata.

Responsabilidade no Pagamentu Tuir Progresu

Tékniku husi ADN.IP no MJDAK halo inspesaun ba progresu ne'e atu bele halo pagamentu ba item sira ne'ebé kompletu ona. Dadus hotu ne'e foti tiha ona hodi prepara ba prosesu pagamentu finál bainhira kompañia entrega obra ba Governu, liuhosi MJDAK.

Diretór kompañia VIKZUM. Unip. Lda., Sr. Vasco Pinto, hatete katak sira-nia parte prontu atu koopera ho Governu hodi aselera obra ne'e. Nia rekoñese katak obra Estadiu Manatutu nian lori ona tempu naruk, no kompañia simu ona rekomendasaun sira husi ADN.IP.

Tuir observasaun hosi tékniku sira, kompañia VIKZUM sei kompleta de'it servisu sira ne'ebé falta hodi tuir data estimasaun entrega obra ba Governu, hodi garante katak Manatutu iha ona fasilidade desportiva ne'ebé kualidade.

Asaun inspesaun ne'e hatudu kompromisu Governu Konstitusionál IX nian atu garante kualidade obra, jestaun responsável ba orsamentu Estadu nian, no konkluzaun ba infraestrutura sira hodi benefisia públiku.

#MídiaMJDAK