Aileu, 12 Novembru 2025 – Selebrasaun Loron Nasionál Juventude (LNJ) ba Dala XX no Komemorasaun Masakre Santa Cruz ba Dala XXXIV iha Aileu hahú ho Missa Solene, Prezide husi Amu Vigáriu Diosezanu, Pe. Carlito Teti Laca, iha Igreja Parókia São Paulo São Pedro Aileu.

Homilia Liga Justisa ba Governante sira

Iha ninia homilia, Amu Vigáriu Pe. Carlito Teti Laca liga leituras Litúrjiku ohin nian ho istória no responsabilidade nasionál Timor-Leste nian. Leituras ne'e liga directa ba prezensa Lideransa Estadu (MJDAK) no autoridade lokál sira:

Leitura I (Livru Sabedoria 6, 1–11): Fó follus ba Governante sira-nia knaar atu halo justisa ho retidaun. Amu Vigáriu apela ba partisipante sira (inklui ekipa Governu MJDAK) atu uza sira-nia pozisaun atu halo justisa ba ema ki'ik.

Evanjellu (São Lucas 17, 11–19): Foka ba gratidun (rekuñesimentu) ne'ebé lepra na'in ida de'it mak hatudu. Amu Vigáriu liga ne'e ba sakrifísiu Loriku Aswain sira nian:

"Eroi sira nia luta mak ohin loron ita hetan liberdade... Sarani sira tenki hakiak dáme no páz hodi harii estabilidade atu kontinua luta naruk ne'ebé luta na'in sira husik hela."

Amu Vigáriu apela atu labele sai hanesan na'in sia (9) ne'ebé haluha kura, maibé atu fila fali no agradese ba Maromak no ba erói sira-nia sakrifísiu hodi servisu ba dezenvolvimentu rai ida-ne'e.

Prezensa MJDAK Simboliza Unidade

Missa ne'e hetan partisipasaun másimu hosi lideransa MJDAK (hanesan Direktór Jerál Juventude, Sr. David Tomás de Deus, no Diretora Jerál Servisu Korporativus, Sra. Isabel Adalziza Fátima Rodrigues Ferreira, joven no estudante sira no mós sobrevivente 12 Novembru sira. Prezensa ne'e hametin valór ba subtema nasionál MJDAK nian: “Husi Santa Cruz ba Aileu – Husi Memória ba Esperansa”, ne'ebé hahú ho fé no morál.

#MídiaMJDAK