DILI, 1 Agostu 2025 – Ministériu Juventude, Desportu, Arte no Kultura (MJDAK), liuhosi Diretór-Jerál Juventude (DJJ), Sr. David Tomás De Deus, ohin ensera ofisiálmente plenária dahuluk husi Parlamentu Foinsa'e Nian (PFN) períodu 2024-2026. Enseramentu ne’e realiza iha salaun Ministériu Solidariedade Sosiál no Inkluzaun (MSSI), Caikoli, Dili.

Rekomendasaun Polítika Husi Joven

DJJ David Tomás de Deus hatete katak plenária ne’e rekolla problema no rekomendasaun importante sira ne'ebé mai husi munisípiu no postu administrativu sira iha territóriu nasionál.

"Rekomendasaun ne’e la'ós obrigatóriu, maibé hanesan dalan ne'ebé membru Parlamentu Nasionál sira halo, halo fiskalizasaun no rekomenda ba Governu," DJJ David De Deus realsa.

Plenária Dahuluk PFN Períodu V ne’e debate no aprova rezolusaun lima (5) kona-ba tópiku sira ne’ebé importante tebes ba dezenvolvimentu nasionál: Juventude no Edukasaun, Juventude ho Saúde, Juventude Empregu no Empregabilidade, Juventude Partisipasaun Sívi-ka, no Juventude, Krime no Violénsia.

Partisipasaun ativu husi Membru PFN hamutuk na'in 126, husi postu administrativu 70, hatudu duni kompromisu Governu nian atu hamosu lideransa joven ne'ebé kualidade.

Dezafiu Empregu no Kompromisu Governu

DJJ David Tomás de Deus realsa komitmentu Governu nian atu kontinua hametin programa PFN nian. Nia mós refere ba Lei Inan RDTL Artigu 50º (Direitu ba Servisu) no Artigu 59º (Edukasaun no Kultura) ne'ebé subliña sidadaun hotu-hotu nia direitu atu asesu empregu, empregabilidade, no formasaun profisionál.

Tuir dadus husi International Labour Organization (ILO) iha tinan 2021, joven ho idade 15-24 okupa 30.5% mak la asesu ba edukasaun, empregu no formasaun. Taxa dezempregu jeral rejista 5.1%, ho joven (15-24) rejista 9.6% mak konsidera dezempregadu.

Atu responde ba dezafiu sira-ne'e, Konsellu Ministrus iha 3 Abríl 2024 aprova ona projetu Rezolusaun Governu kona-ba alterasaun daruak ba Rezolusaun Governu ne’ebé aprova PFN. Projetu ne’e ho objetivu atu hametin programa ne'ebé foka liuliu ba formasaun iha área edukasaun sívi-ka no sidadania, empreendedorizmu, metodolojia peskiza, meiu ambiente, no teknolojia informasaun no komunikasaun.

PFN nu'udar Eskola Lideransa

Prezidente Alumni Parlamentu Foinsa'e Timor-Leste (APFTL), Sr. Zaulino Gomes da Silva, apresia PFN sira tanba sira bele partisipa iha plenária hodi produs rezultadu ida.

"Problema juventude la'ós problema MJDAK nian de'it, ne'e problema Estadu nian, entidade hotu iha responsabilidade," Sr. Zaulino Gomes da Silva hateten.

MJDAK agradese ba PNTL ne'ebé oferese fatin akomodasaun, MSSI ne'ebé oferese fatin plenária, no APFTL ne'ebé organiza no servisu makaas. Komitmentu ne'e hatudu katak PFN nu'udar programa ne'ebé Governu nafatin iha komitmentu hodi kontinua ba oin atu forma futuru lider ne'ebé kualidade.

#MídiaMJDAK