DILI, 18 Setembru 2025 – Gabinete Inspesaun no Auditória (GIA) husi Ministériu Juventude, Desportu, Arte no Kultura (MJDAK) partisipa ona iha Reuniaun Reguler Inspetór no Auditór sira husi Administrasaun Públika ba Trimestre Da-toluk 2025.

Reuniaun ne'e, ho tema "Analiza no Konsolida ba Estatutu Karreira Inspetór no Auditór sira Hodi Hametin Governasaun no Transparénsia," realiza iha salaun Ministériu Finansas, Aitarak Laran.

Inspetór GIA-MJDAK, João dos Santos, moderra reuniaun ne'e, ne'ebé loke ofisiálmente husi Komisáriu Funsaun Públika (KFP) Asuntu Reformadu, Fausto Freitas da Silva.

Hametin Governasaun no Transparénsia

Iha ninia intervensaun, Fausto Freitas da Silva hateten katak objetivu prinsipál husi reuniaun ne'e mak atu diskute no konsolida estatutu karreira inspetór no auditór sira-nian, hodi hametin governasaun di'ak no transparénsia iha setór administrasaun públika.

Komisáriu Freitas da Silva enkorajá inspetór sira hotu atu "brani foti desizaun ba kualker asuntu hodi rezolve problema atu dezenvolve ita-nia rai."

Hasa'e Kualidade Koñesimentu

Husi parte Inspetór Jerál Estadu (IGE), Francisco de Carvalho, husu ba Governu atu hasa'e kualidade koñesimentu ba inspetór sira, liu-liu iha área servisu aprovizionamentu nian. IGE hateten katak kapasitasaun ne'e importante tebes atu inspetór sira bele fahe informasaun ho Konsellu Diretór sira iha liña ministeriál sira hotu.

Reuniaun importante ne'e partisipa husi inspetór sira husi liña ministeriál várius, inklui MJDAK, MESCC, MAPPF, MPIE, MSSI, MPRM, MDRHC, MI, MTA, MCI, no instituisaun autónoma sira seluk.

#MídiaMJDAK