DILI, 29 MAIU 2026 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, simu vizita husi Konsellu Nasionál Juventude Katólika Timor-Leste (CNJCTL) iha Salaun Uma Nahe Biti Boot, Lecidere, Dili. Vizita ne'e hala'o ho partisipasaun husi Pe. Francisco Indra do Nascimento Tey Seran (Prezidente Executivu CNJCTL), Pe. Cirilo dos Santos Maia (COJUCAD), hamutuk ho foinsa'e Juventude Katólika husi Diocese Maliana, Baucau, no Dili, ne'ebé hala'o asembleia fé Turnu V 2026.

Iha enkontru ne'e, Ministru Nelyo Isaac Sarmento hatete katak asembleia ba hametin fiar importante tebes ba ema hotu atu iha kompriensaun hodi prepara an atu bele lidera família no komunidade ho domin, fé, no empatia.

"Asembleia fé ida ne'e importante tebes ba ita hotu-hotu iha hanoin ida oinsá mak bele iha kompriensaun prepara ita nia aan atu tempu ida bele lidera ita nia família, komunidade. Ita hatene ita iha fé, domin ba ema seluk. Ida ne'e hanesan meius ida atu forma ema atu tama iha ema barak nia leet, koko hatene uluk sira nia situasaun ne'ebé hasoru atu ita bele iha empatia ho sira, atu bele kompriende no tulun malu iha sosiedade," dehan Ministru.

Lideransa Ministru mós hein katak entre foinsa'e sira ne'e, balu sei prepara an atu involve iha politika estadu, sai lideransa, no mós sai padre ka madre. Nia enfatiza katak wainhira tau fiar metin iha Nai Maromak, buat hotu sei la'o tuir ninia dalan, no foinsa'e sira tenke evita hanoin negativu ne'ebé bele atrai atensaun ba buat la di'ak.

Ministru mós husu atu foinsa'e sira forma família ho responsabilidade, edukasaun ne'ebé di'ak ba jerasaun tuir mai, no labele eduka oan sira ho violénsia, maibé ho liafuan no moral. Objetivu mak atu prepara jerasaun foun ne'ebé bele sai lider di'ak no sidadaun maduru ne'ebé hanoin ba interese estadu, nu'udar ema katóliku ne'ebé hatene respeita no hadomi malu.

Partisipa iha atividade ne'e mai husi foinsa'e Katólika Diocese Maliana, Baucau, no Dili.

MJDAK kontinua apoia inisiativa juventude ne'ebé pozitivu no konstrutivu hodi forteze unidade, fiar, no dezenvolvimentu nasionál.

#MediaMjdak