MINISTRU MJDAK SIMU REUNIAUN KORTEZIA HO EMBAIXADOR ÍNDIA NO PREPARA KOMEMORASAUN LORON INTERNACIONÁL YOGA 2026

DÍLI, 16 JUÑU 2026 – Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento, ohin hala'o reuniaun kortezia ho Embaixador Índia ba Timor-Leste, Sua Exelénsia Shri Mahendra Singh Patiyal, iha Dili. Reuniaun ne'e mós sai oportunidade ba Embaixador Índia atu konvida formalmente Ministru Nelyo Isaac Sarmento atu lidera komemorasaun Loron Internasionál Yoga ne'ebé sei monu iha loron 21 Juñu 2026.

Iha sorumutu ne'e, Ministru Nelyo Isaac Sarmento hatudu agradese boot ba prezensa Embaixador Índia nian no konvite ne'ebé fó atu partisipa iha atividade ida ne'e. Nia deklara ho laran haksolok atu marka prezensa iha loron internasionál Yoga no sei konvida mós funsionáriu MJDAK hotu atu partisipa, hodi promove estilu moris saudável liuhusi prátika Yoga.

Reuniaun ne'e marka mós prezensa husi Pawan Kadyan, Asuntu Polítiku Embaixada Índia, Diretor Jeral Desportu, Diretor Jeral Juventude, no Asesor MJDAK. Sorumutu ne'e reforsa relasaun diplomátika no kooperasaun entre Timor-Leste no Índia, partikularmente iha área juventude, desportu, no promosaun saúde liuhusi prátika Yoga.

Loron Internasionál Yoga ne'ebé sei hala'o iha loron 21 Juñu 2026 ho tema "Yoga ba Envelhesimentu Saudável" sei sai mós momentu atu fortalese amizade entre nasaun rua no promove kultura moris di'ak ba jerasaun foun.

#MediaMjdak