DILI, 25 Setembru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, hala’o sorumutu importante ho Koordenadór Rezidente Nasoens Unidas (ONU) nian iha Timor-Leste, Sra. Olufunmilayo (Funmi) Abosede Balogun-Alexander. Enkontru ne'e hala'o iha Salaun Magna MJDAK, Lecidere.

Objetivu prinsipal husi sorumutu ne’e mak atu diskute proposta kooperasaun ida kona-ba kriasaun servisu empregu no oportunidade dezenvolvimentu kapasidade ba juventude iha munisípiu sira.

Proposta ONU Foka ba Esperiénsia Profisionál

Iha enkontru ne’e, Koordenadora Rezidente ONU, Sra. Funmi Balogun, aprezenta proposta ida ne’ebé ho objetivu atu oferese:

1.    Esperiénsia Servisu Profisionál

2.    Formasaun Kualidade

3.    Oportunidade Servisu Komunitáriu

Inisiativa ne’e foka liu ba foin-sa’e sira ne’ebé hela iha munisípiu, hodi kapasita sira liuhusi atividade prátika ne’ebé bele prepara sira ba iha merkadu traballu.

Diskusaun ne’e hatudu kompromisu hamutuk entre Governu Timor-Leste (liuhusi MJDAK) no Nasoens Unidas atu aborda dezafiu empregu juventude nian no esplora oportunidade foun hodi dezenvolve kapasidade juventude iha nasaun tomak.

Husi parte Nasoens Unidas, partisipa mós Reprezentante Fundu Populasaun Nasoens Unidas (UNFPA) iha Timor-Leste, Navchaa Suren.

Enkuantu, delegasaun MJDAK nian kompostu husi Xefe Gabinete MJDAK, Diretora-Jerál Servisu Koorporativu, no Asesór Relasaun Bilaterál.

#MídiaMJDAK