DILI, 29 Jullu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin fó refleksaun kona-ba susesu boot husi XII Jogos Desportivos da CPLP 2025 liuhosi entrevista eskluziva ho RTTL-EP.

Ministru Nelyo Isaac Sarmento hatete katak: "Jogos ida ne’e marka istória boot ba ita-nia jornada," hodi rekoñese katak organizasaun ne'e nu'udar susesu nasionál ne'ebé hatudu ona kapasidade Timor-Leste nian.

Orgullu ba Susesu Organizasionál

Ministru Nelyo hatete nia sente orgullu boot no hato'o agradesimentu hosi laran ba Komisaun Organizadora, funsionáriu MJDAK, no públiku jerál, tanba kontribuisaun boot sira-nian ne'ebé lori ba rezultadu ne'e.

Nia realsa katak susesu la'ós de'it ho medalla, maibé liuliu ho ospitalidade:

"Ita bele la hetan medalla barak, maibé ita, nia bainaka sira la’o ba mai ho laran di’ak, deskansa di’ak, hodi hatudu ba mundu katak Timor-Leste mak uma-na’in ne’ebé di’ak."

Desportu nu'udar Plataforma ba Páz no Inkluzaun

Ministru Nelyo Sarmento subliña valór esensiál desportu nian ne'ebé la'ós atu kria inimigu, maibé atu lori ba Páz, inkluzaun, no harmonia polítika. Nia apela atu loke liafuan iha laran: "Desportu bele sai plataforma ba belun no solidariedade."

Nia mós realsa katak desportu loke prioridade ba Governu atu hadia infrastrutura, no hetan atensaun polítika ida ne’ebé bele sustenta dezenvolvimentu joven no komunidade sira.

Apelu ba Joven no Polítika

Hodi haree katak maioria atleta sira mak estudante no joven husi Munisípiu, Ministru Nelyo Sarmento husu ba parte hotu-hotu:

“Haketak desportu husi polítika, hodi lori ita-nia atleta no juventude ba oin!”

MJDAK hato'o obrigadu ba sira hotu ne’ebé halo Jogos CPLP 2025 sai susesu. "Timor-Leste nian orgullu mak ita-nia uniaun!"

#MídiaMJDAK