DILI, 23 Outubru 2025 – Ministériu Juventude, Desportu, Arte no Kultura (MJDAK), liuhosi Sua Exelénsia Ministru Nelyo Isaac Sarmento, ohin hala'o audiénsia públika ho Komisaun G Parlamentu Nasionál (PN) kona-ba Proposta Lei N.º 23/VI/3a – Orsamentu Jerál Estadu (OGE 2026).

Audiénsia ne’e hala'o iha Sala Eis Ministériu Finansas PN nian, ho partisipasaun másimu husi Prezidente Komisaun G, Distintu Deputadu Armando Dos Santos Lopes, no Vise-Prezidente Komisaun G, Distintu Deputadu Gabriel Soares.

Ministru Nelyo Isaac Sarmento akompaña husi ekipa xefia MJDAK, ne'ebé inklui Diretór Jerál Juventude (DJJ), David Tomás De Deus, Diretora Jerál Servisu Korporativu (DJSK), Isabel Adalziza Fátima Rodrigues Ferreira, Diretór Jerál Arte no Kultura (SEAK), Gil Paulino de Oliveira, hamutuk ho Xefe Gabinete sira.

Ezekusaun OGE 2025 no Proposta OGE 2026

Ministru Nelyo Isaac Sarmento hatete katak ezekusaun OGE MJDAK nian to’o ohin loron atinje ona 76.32%, liuhosi programa tolu (3): Funsionamentu Institusionál, Inkluzaun Sosiál, no Kultura.

Dadus Ezekusaun (Aprosimadu) 2025 to’o Outubru: Saláriu Vensimentu: Uza ona $2.1 Milhões (prontu atu selu to'o Dezembru). Bens Servisu: Husik hela balansu $405 Mil, ho komitmentu selu obrigasaun sira. Kapitál Dezenvolvimentu: Husi orsamentu $631 Mil, agora iha ona $490 Mil hein atu Cro-Check obra sira ne’ebé la’o hela (hanesan fasilidade desportiva). Transferénsia Públika: Uza ona $2.4 Milhões, ho balansu $1.5 Milhões ne’ebé sei uza ba kompetisaun desportiva iha Fulan Novembru no Dezembru.

Proposta OGE 2026 nian: Ministru ne’e esplika katak OGE 2026 nian hamutuk $11.308 Milhões, ne’ebé aloka ba: Saláriu Vensimentu: $2.3 Milhões; Bens Servisu: $1.5 Milhões; Kapitál Dezenvolvimentu: $1.2 Milhões no Transferénsia Públika: $6.1 Milhões.

Apoiu PN no Proposta Adisionál

MJDAK husu ba PN atu konsidera proposta adisionál balu ba OGE 2026, inklui:

1. Orsamentu $785 Mil ba partisipasaun Arte no Kultura nian iha prestiziu Venice Biennale.
2. Aumentu Saláriu Vensimentu hamutuk $513 Mil ba funsionáriu sira.

Vise-Prezidente Komisaun G, Distintu Deputadu Gabriel Soares, hatete katak Komisaun apresia no laiha dúvida kona-ba orsamentu MJDAK nian, tanba atividade sira MJDAK nian "hamoris tebes Timor-Leste nia naran iha mundu."

Deputadu Soares mós sujere atu MJDAK aprezenta proposta adisionál ne'e iha debate espesialidade hodi Komisaun bele haree verba balu ne'ebé hakarak aumenta atu lori hakbiit atividade MJDAK nian.

Partisipa mós iha audiénsia públika ne'e Prezidente KRAM, Octávio da Conceição, Diretór Nasionál no Kargu Xefia sira iha MJDAK no SEAK, hamutuk ho ekipa téknika husi Komisaun G PN.

#MídiaMJDAK