DILI, 16 Jullu 2025 — Konsellu Ministru (KM) hala'o sorumutu iha Palásiu Governu, Dili, hodi aprova projetu Dekretu-Lei importante rua, ne'ebé aprezenta husi Ministru Ensinu Superiór no Ministru Juventude, Desportu, Arte no Kultura (MJDAK), Nelyo Isaac Sarmento.

Aprova Dekretu-Lei Asesu Ensinu Superiór

Ministru Ensinu Superiór, José Honório da Costa Pereira Jerónimo, aprezenta projetu Dekretu-Lei kona-ba Asesu no Ingresu iha Ensinu Superiór. Diploma ida-ne'e define rejime jurídiku ba estudante sira ne'ebé remata ona eskola sekundária no hakarak kontinua ba ensinu superiór, tantu iha instituisaun públika ka privadu.

Dekretu-Lei ne'e kria rejime jerál ida ho kritériu uniforme ba admisaun. Nune'e mós, kria rejime espesiál ba grupu vulneravel sira hanesan ema ho defisiénsia, membru família ne'ebé iha situasaun vulneravel, no sidadaun sira ne'ebé estuda iha estranjeiru.

Hodi asegura prosesu ne'e, sei kria Komisaun Koordenadora ba Asesu Ensinu Superiór (CAES), ne'ebé sei organiza no superviziona prosesu tomak, inklui ezame, klasifikasaun, no validasaun lista.

Aprova Subsídiu ba Jogu CPLP

Konsellu Ministru aprova mós projetu Dekretu-Lei ne'ebé aprezenta husi Ministru MJDAK, Nelyo Isaac Sarmento, kona-ba subsídiu disponibilidade no dedikasaun iha ámbitu XII Jogu Desportivu CPLP 2025.

Subsídiu ida-ne'e ho objetivu atu rekoñese no fó kompensasaun ba esforsu no dedikasaun total husi voluntáriu, atleta, treinadór, árbitru, ofisiál, animadór, funsionáriu kontratadu, no funsionáriu públiku sira husi MJDAK ne'ebé partisipa diretamente iha preparasaun no ezekusaun eventu ne'e. Subsídiu ne'e sei fó ba sira ne'ebé serbisu liu oras tolu kada loron, entre 17 Maiu to'o 27 Jullu 2025.

Relatóriu Kualidade Aviasaun Sivíl

Ikusliu, Ministru Transportes no Komunikasoins, Miguel Marques Gonçalves Manetelu, aprezenta rezultadu relatóriu preliminár husi auditoria Organizasaun Internasionál Aviasaun Sivíl (ICAO). Relatóriu ne'e identifika frakeza no rekomendasaun sira atu hadi'a kondisaun seguransa aviasaun sivíl nasionál nian.

#MídiaMJDAK