JAKARTA, 22 MAIU 2026 – Ministériu Juventude, Desportu, Arte no Kultura (MJDAK) liuhusi Comissão Nacional do Desporto (CND) ofisialmente asina Memorandu Entendimentu (MoU) ho Indonesia Anti-Doping Organization (IADO) iha Hotel Mercure Gatot Subroto, Jakarta, Indonézia, iha loron 21 Maiu 2026.

Akordu estratéjiku ne’e asina husi Secretário Executivo CND, Sr. João Rogério M. Rodrigues, no Presidente IADO, Sr. Gatot S. Dewa Broto, ho objetivu atu asegura katak foin-sa’e no atleta nasionál sira kompete ho onestu, moos, no livre husi doping iha nívél internasionál. Pasu ne’e refleta komitmentu boot Governu nian hodi proteje integridade desportu nasionál.

Liu husi MoU ne’e, CND sei simu asisténsia téknika kompletu husi IADO iha área sira tuir mai: teste kontrolu doping, jestaun rezultadu teste, no Autorizasaun ba Uzu Terapéutiku (AUT ka TUE). Kooperasaun ne’e mós sai baze importante ba MJDAK hodi proteje no prepara atleta Timor-Leste sira ne’ebé sei kompete iha Asian Games no Asian Para Games 2026.

Durante viajen ofisiál ne’e, Secretário Executivo CND, Sr. João Rogério M. Rodrigues, mós observa diretu prosesu audiénsia kazu doping hamutuk tolu (3) ne’ebé hala’o husi loron 22 to’o 23 Maiu 2026. Obserbasaun ne’e parte integrante husi esforsu CND nian atu hasa’e koñesimentu no kapasidade téknika institusaun iha jestaun anti-doping.

“Asinatura MoU ida-ne’e sei asegura apoiu tékniku no institusionál ne'ebé kle'an iha área anti-doping. Partisipasaun no observasaun direta ba audiénsia kazu doping sira-ne'e sei kontribui duni ba aumentu koñesimentu no kapasidade téknika CND nian. Ita-nia objetivu mak atu dezenvolve no implementa sistema anti-doping ne'ebé tuir padraun internasionál hodi proteje ita-nia atleta sira,” deklarasaun husi Sr. João Rogério M. Rodrigues.

Jestaun anti-doping ne’ebé rigurózu sei hametin kumprimentu Timor-Leste nian ba padraun mundiál, hodi foti sa’e prestíjiu no kredibilidade desportu nasionál iha palku internasionál.

Mai ita hamutuk dudu dezenvolvimentu desportu Timor-Leste ne’ebé moos, onestu, no profesionál! Ho parseria ne’e, MJDAK kontinua loke dalan seguru ba foin-sa’e sira hodi lori naran kmanek nasaun nian ba nívél mundiál!

#MediaMjdak