Díli, 29 Juñu 2026 – Sua Excelénsia Ministru Juventude, Desportu, Arte no Kultura (MJDAK), Nelyo Isaac Sarmento (NIS), ohin hala'o reuniaun plenáriu hamutuk komisariu sira hodi deside tempu atu fó ba Komisaun Nasionál Desportu (CND) atu halo levantamentu dadus foun ba organizasaun desportiva sira.

Reuniaun plenáriu ne'e hala'o iha Salaun Magna MJDAK, Lesidere, Dili, Timor-Leste, ho partisipasaun husi Prezidente CDTL, Sekretariu Jeral CONTL, Prezidente Powerlifting, no Sekretariu CND inklui staf CND nian.

Prezidente CND, Nelyo Isaac Sarmento, ne'ebé mós nu'udar Ministru Juventude, Desportu, Arte no Kultura, hateten katak Governu iha obrigasaun atu hadia sistema organizasaun desportiva sira.

"Komunidade sira hakarak mak forma deit federasaun, maibé laiha estratéjia no hakarak kria ba kuantidade deit, laiha kualidade. Ne'e susar atu hetan," hateten Ministru Nelyo.

Tanba ne'e mak, Governu liu husi CND sei halo fila fali levantamentu dadus foun ba modalidade ne'ebé eziste iha Timor-Leste. Kuandu iha problema, parte CND bele halo rekomendasaun hodi suspende ka taka organizasaun desportiva ne'ebé laiha funsaun durante tinan naruk nia laran.

Atu nune'e, Governu bele fokus halo investimentu ba organizasaun desportiva ne'ebé iha programa no planu klaru.

"Ho nune'e mak husu ba komisariu sira atu halo dezisaun koletiva ida, atu nune'e bele fó ba CND atu halo fali levantamentu dadus ba organizasaun desportiva sira hotu hodi hare ba sira-nia organizasaun, se kunadu laiha, CND bele rekomenda atu bele taka hodi nune'e fó tempu ba seluk hodi bele investe ho di'ak liu tan," dehan nia.

Aleinde ne'e, organizasaun desportiva ne'ebé kompletu, Governu sei atribui utilidade públika ba organizasaun desportiva ne'ebé iha, tanba Timor-Leste mós iha fasilidade desportiva sira.

"Tamba ita hotu hatene katak fasilidade desportiva balun hahu ona, espera katak tinan oin bele remata ona, no balun sai ona eskritóriu ba modalidade ne'ebé Governu rekonese no presiza halo investimentu," subliña nia.

Ministru Nelyo mós fó hanoin ba CONTL no CDTL atu intende didiak ba Governu nia desizaun, atu nune'e bele servisu hamutuk hodi tau matan ba maluk sira ne'ebé kaer federasaun ne'e ho kualidade no profesional.

Reuniaun ida-ne'e mós sai pasu importante atu asegura katak organizasaun desportiva sira iha Timor-Leste funsiona ho di'ak, ho estratéjia klaru, no hatudu kualidade ne'ebé bele kontribui ba dezenvolvimentu desportu nasionál.

#MediaMjdak