DILI, 14 JUÑU 2026 – Sua Exelénsia Nelyo Isaac Sarmento, Ministru Juventude, Desportu, Arte no Kultura (MJDAK), marka prezensa iha V Assembleia Jerál Comité Olímpico Nasionál Timor-Leste (CONTL) ne'ebé realiza iha Timor Plaza, Dili. Assembleia ne'e mós hetan partisipasaun husi delegadu federasaun desportiva nasionál sira.

Iha ninia intervensaun, Ministru Nelyo Isaac Sarmento reafirma katak Governu, liuhusi MJDAK, sei kontinua hametin apoiu ba setor desportu no servisu hamutuk ho CONTL atu dezenvolve talentu atleta timoroan sira, hasa'e kualidade desportu nasionál, no prepara Timor-Leste atu partisipa ho di'ak liután iha kompetisaun internasionál sira.

"Governu komprometidu atu apoia dezenvolvimentu desportu nasionál. Kooperasaun forte entre MJDAK no CONTL mak xave atu asegura katak ita-nia atleta sira hetan preparasaun ne'ebé di'ak hodi kompete iha nível rejional no mundiál," deklara Ministru.

Durante Assembleia Jerál, delegadu husi federasaun desportiva nasionál sira ho unanimidade hili fila-fali Francisco Kalbuadi Lay nu'udar Prezidente CONTL ba mandatu 2026-2030, demonstrandu konfiansa no apoiu forte ba ninia lideransa. Lideransa foun ne'e sei hala'o mandatu ho responsabilidade atu kontinua dezenvolve desportu iha Timor-Leste no hametin pozisaun nasaun iha movimentu olímpiku internasionál.

MJDAK hato'o parabéns ba lideransa foun CONTL no espera katak kooperasaun entre Governu no movimentu olímpiku nasionál bele sai mais forte hodi promove desportu nu'udar meiu ida ba dezenvolvimentu juventude no prestíjiu nasionál.

Hamutuk ita dezenvolve desportu. Hamutuk ita hasa'e naran Timor-Leste iha mundu.

#MediaMjdak