DILI, 28 MAIU 2026 – Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento, partisipa iha debate Orsamentu Retifikativu (OR) ne'ebé hala'o iha Parlamentu Nasional, ho objetivu atu diskute no aprova ajustamentu orsamentál ba tinan fiskál 2026.

Debate ne'e lidera husi Sua Exelénsia Prezidente Parlamentu Nasional, Deputada Maria Fernanda Lay, no partisipa mós Sua Exelénsia Primeiru-Ministru Kay Rala Xanana Gusmão, hamutuk ho membru XI Governu Konstitusionál sira.

Orsamentu Retifikativu ne'e sei debate durante loron ha'at, ne'ebé hahu ohin loron 28 Maiu to'o 02 Juñu 2026, ho faze jeneralidade durante loron ida no faze espesialidade durante loron tolu. Faze jeneralidade sei foka ba aprovasaun polítika orsamentál no prioridade nasionál, hodi tuir mai faze espesialidade analiza detalhadamente alokasaun fundus ba setór sira, inklui setór juventude, desportu, arte no kultura.

Partisipasaun Ministru Nelyo Isaac Sarmento iha debate ne'e refleta kompromisu Governu nian atu garante katak alokasaun orsamentál ba setór juventude no desportu kontinua prioriza, hodi suporta dezenvolvimentu infraestrutura, programa formasaun, no preparasaun atleta ba kompetisaun internasionál.

#MediaMjdak