BOBONARO, 29 Agostu 2025 – Sua Exelénsia Ministru Juventude, Desportu, Arte, no Kultura (MJDAK), Nelyo Isaac Sarmento, ohin partisipa iha Misa Agradesimentu ba Jornada Nasionál Kruz Joven Internasionál no Nasionál. Misa ne'e hala'o iha Parókia Nossa Senhora Imaculada Conceição Bobonaro.

Partisipasaun MJDAK nian ne'e hatudu kompromisu Governu nian atu apoia no hametin valór sosiál no espíritu dame ne'ebé promove husi eventu relijiozu nasionál sira.

Mensajen Lider Relijiozu: Konversaun no Dame ba Joven Sira

Misa ne'e prezide husi Amu Bispu Dioseze Maliana, Dom Norberto do Amaral, hamutuk ho Sua Eminénsia Cardeal, Dom Virgílio do Carmo da Silva, SDB (Bispu Dioseze Díli), no Bispu Dioseze Baucau, Dom Leandro Maria Alves.

Iha ninia mensajen, Amu Bispu Dom Norberto do Amaral subliña katak prezensa Kruz Joven iha Timor-Leste atu ema hotu bele konverte aan husi sala, egoizmu, no hahalok at sira hodi moris iha páz no armónia.

"Nune’e, ita bele konverte aan husi egoizmu, hahalok at sira, no dezorden iha sosiedade nia laran, atu ema bele fila fali ba dalan ne’ebé loos husi Aman Maromak ne’ebé harii iha mundu ida-ne’e ho páz, armónia, no trankilidade," Dom Norberto apela.

Nia mós reforsa katak joven sira tenke uza Kruz nu'udar referénsia hodi kuda virtude haraik-aan, pasiénsia, no labele loko-an demais. Joven sira tenke sai apóstolu ba joven sira seluk, hodi reflete hahalok atu transforma aan no hametin fiar.

Kruz Joven Entrega ba Dioseze Díli

Hafoin remata misa, sarani husi Parókia Bobonaro entrega hikas Kruz Joven Internasionál no Nasionál ne'e ba sarani sira husi Dioseze Díli, liuliu ba Parókia Remexiu. Moradór no lia-na’in sira husi São José Remexiu simu Kruz ne'e ho tradisaun lian-dadolin, nu'udar símbolu husi kontinuidade fiar nian no unidade.

Misa agradesimentu ne'e hetan partisipasaun husi sarani no peregrinu hamutuk 644, inklui inan-aman husi Parókia Bobonaro, no Komisaun Organizadora husi parókia sira seluk.

#MídiaMJDAK