DILI, 26 Jullu 2025 – Iha Sábada kalan, Estádiu Munisipál Dili sai nu'udar testemunña ba jogu finál ne'ebé nakonu ho tensaun no emosaun ba modalidade Futebol Sub-16 (U16) ba XII Jogos Desportivos da CPLP 2025. Jogu ne'e hasoru ekipa maka'as rua husi áfrika lusófona, Angola kontra Cabo Verde.

Jogu ne'e hatudu duni espíritu desportivu ne'ebé aas, maibé remata ho empata 1-1 iha tempu regulamentár, ho golu ne'ebé akontese iha minutu ikus sira:

• Cabo Verde marka uluk liuhosi Janilson iha minutu 78.
• Angola hatán kedas, ho kapitán Angola nian marka golu husi penálti minutu tolu (3) liu tiha.

Ho rezultadu empata ida-ne'e, desizaun tenke liu husi sesaun penálti dramátiku. Iha sesaun ikus ne'e, Cabo Verde hatudu duni ninia efikásia no konsege manán ho eskor finál 4-3 iha penálti.

Selebrasaun ba Viória no Espíritu Luta

Ho vitória ne'e, ekipa U16 husi Cabo Verde sákra nu'udar Juara ba modalidade Futebol U16 CPLP nian, no lori medalla Ouro ba sira-nia nasaun.

MJDAK hato'o parabéns boot ba ekipa Cabo Verde ba sira-nia manán istóriku ne'e. No mós hato'o apresiasaun boot ba ekipa Angola nian ba sira-nia performa di'ak no espiritu luta boot ne'ebé hatudu to'o rohan. Jogu finál ida-ne'e sei hela duni iha memória adeptu sira nian nu'udar ezemplu di'ak ba kompetisaun desportiva.

#MídiaMJDAK