DILI, 16 JUÑU 2026 – Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento, simu konvite ofisial husi CEO Holywings Sport Show (HSS), Paris Pernandes, atu asiste eventu boxe entre Timor-Leste no Indonésia ne'ebé sei hala'o iha Bali, Indonésia, iha loron 27 Jullu 2026.

Konvite ne'e fó iha sorumutu iha Salaun Magna MJDAK, ne'ebé mós marka prezensa CEO HSS iha Timor-Leste ho objetivu atu buka no seleksiona boxista Timór nian hodi hasoru boxista Indonésia iha ring.

Iha okaziaun ne'e, Ministru Nelyo Isaac Sarmento hatete katak eventu ne'e hanesan previléjiu boot ba boxista Timór nian, tanba fó espasu ba sira atu hasa'e no hatudu sira-nia talentu iha mundu boxe internasionál.

"Ida ne'e espasu ne'ebé diak tebes ba atleta Timor-Leste, liuliu iha modalidade boxing, atu hasa'e no hatudu sira nia talentu iha mundu boxing. Ami aprecia iniciativa ida-ne'e no espera katak eventu ne'e sei lori benefísiu ba dezenvolvimentu boxe nasionál," deklara Ministru Nelyo.

Partisipasaun boxista Timór nian iha eventu internasionál ne'e mós hanesan parte husi esforsu Governu nian atu promove desportu no fó oportunidade ba atleta sira atu kompete iha nível rejional, hodi prepara sira ba kompetisaun boot liu tan iha futuru.

MJDAK kontinua apoia inisiativa sira ne'ebé fó valor ba dezenvolvimentu desportu nasionál no promove amizade bilaterál liuhusi desportu.

#MediaMjdak