DÍLI, 13 MARSU 2026 – Súa Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, realiza enkontru ho estrutura foun Asosiasaun Futsal Timor-Leste (AFTL) hodi diskute kadiak dezenvolvimentu desportu futsal iha rai-laran. Enkontru ne’e hala’o iha Salaun Magna MJDAK, Lecidere, Díli.

Iha enkontru ne’e, Ministru Nelyo Isaac ne’ebé akompaña husi Xefe Gabinete, Egas Barros Guterres Godinho, esprime ninia apresiasaun boot ba inisiativa no vizaun husi estrutura AFTL ne’ebé kompostu husi foin-sa’e sira ne’ebé iha dedikasaun aas ba futsal.

“Ha’u apresia tebes ho estrutura foun AFTL. Maske ita sei iha limitasaun ba fasilidade, maibé Governu liuhusi MJDAK foka hela ba finalizasaun kampu futsal iha Taibesi ne’ebé tuir ona padraun internasionál. Ida-ne’e sei sai fatin prinsipál hodi prepara ita-nia Selefasaun Nasionál ba kompetisaun sira,” subliña Ministru MJDAK.

Súa Exelénsia mós sujere ba AFTL atu foka liu ba programa prioridade sira ne’ebé bele realiza iha tinan ida-ne’e nia laran, hanesan liga futsal, taxa kopa, no mós programa treinamentu ba labarik sira ne’ebé hala’o hela iha sentru juvenil sira. Governu liuhusi MJDAK prontu atu fó apoiu ba inisiativa sira-ne’ebé iha impaktu diretu ba dezenvolvimentu modalidade ne'e.

Aleinde apoiu husi Estadu, Ministru Nelyo Isaac enkoraja Prezidente AFTL, Antoninho Junior Guterres Ximenes, atu harii ligasaun ho setór privadu (emprezáriu sira) liuhusi parseria estratéjika ne’ebé bele benefisia parte rua, liuliu iha promosaun produtu liuhusi eventu desportivu.

Partisipa iha atividade ne’e, Prezidente AFTL ho ninia estrutura foun, hamutuk ho ekipa tékniku husi MJDAK.

#MídiaMJDAK