DÍLI, 25 Fevereiru 2026 — Ministériu Juventude, Desportu, Arte no Kultura (MJDAK) enserra workshop loron tolu kona-ba Lei Administrasaun Públika no Prevensaun Korupsaun, ne’ebé hala’o husi loron 23 to’o 25 Fevereiru 2026, ho objetivu atu hametin kapasidade funsionáriu no parseiru sira hodi jere orsamentu Estadu ho transparénsia, responsabilidade no integridade.

Inisiativa ida-ne’e reflete komitmentu institusionál atu asegura katak “sentavu ida husi povu nia osan” uza ho loloos no fó benefísiu ba dezenvolvimentu nasionál.

Iha serimónia encerramentu, Xefe Gabinete MJDAK, Egas Barros Guterres Godinho, subliña katak integridade mak elementu fundamentál iha servisu públiku.

“Integridade mak sasukat primeiru atu serbisu ba nasaun no atu garante kualidade servisu ne’ebé moos no transparente,” dehan nia.

Durante workshop, partisipante sira hetan orientasaun kona-ba área prioritária sira ne’ebé importante ba ezekusaun servisu públiku, inklui:

Integridade Institusionál: Hametin valor étika no responsabilidade iha administrasaun públika

Ezekusaun OJE 2026 ne’ebé Moos: Orientasaun téknika atu ezekuta orsamentu ho didi’ak, evita sala prosedimentál no asegura relatóriu finanseiru ne’ebé di’ak

Prevensaun Korupsaun: Aprofundamentu ba Lei n.º 7/2020 hodi prevene iregularidade no abusus iha jestaun públika

Regra Foun Aprovizionamentu: Klaresimentu kona-ba prosedimentu kontratu públiku no mekanizmu doasaun ba federasaun sira

Responsabilidade Parseiru: Federasaun no organizasaun juventude sira reforsa komitmentu atu jere fundu ho transparénsia no responsabilidade

Workshop ne’e konta ho partisipasaun husi dirigente sira, kargu xefia, funsionáriu permanénte no kazuál, no mós reprezentante federasaun desportiva no organizasaun juventude oioin.

Ho realizasaun atividade ida-ne’e, MJDAK espera katak instituisaun no parseiru sira bele aumenta kapasidade jestaun no kontribui ba dezenvolvimentu juventude, desportu, arte no kultura ne’ebé transparente, efisiente no sustentável.

#MídiaMJDAK