HANOI, VIETNAME, 16 Outubru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, partisipa iha Reuniaun Nível Ministrus ASEAN ba Desportu Da-Ualu (AMMS-8), ne'ebé hala'o iha Hanoi, Vietname, iha loron 16 to'o 17 Outubru 2025.

Reuniaun high-level ne'e halibur Ministru no Xefe Delegasaun sira husi Estadu Membru ASEAN nian, hodi diskute vizaun no estratéjia ba dezenvolvimentu desportu sustentável iha rejiaun, no Timor-Leste partisipa nu'udar nasaun observadór ne'ebé ho partisipasaun másima.

Timor-Leste no Vizaun Desportu ASEAN nian

Iha reuniaun ne'e, Ministru Nelyo Isaac Sarmento hato'o deklarasaun kona-ba perspetiva Timor-Leste nian hodi kontribui ba dezenvolvimentu desportu rejionál. Partisipasaun MJDAK nian ne'e importante tebes atu hatudu Timor-Leste nia prontidaun hodi integra an ba iha inisiativa desportiva no sosiál-kulturál ASEAN nian.

Pontu sentrál sira ne'ebé diskute iha AMMS-8 inklui:

1.    Planu Asaun ASEAN ba Desportu (2026–2030): Formulasaun planu foun atu foka ba desportu komunitáriu, desportu ba ema ho defisiénsia, no promosaun jéneru.

2.    Kooperasaun Internasionál: Promosaun kooperasaun ho parseiru importante sira hanesan FIFA no World Anti-Doping Agency (WADA).

3.    Inovasaun no Sustentabilidade: Uza siénsia no teknolojia ba dezenvolvimentu desportu profisionál no promove desportu ne'ebé verde no sustentável.

Reafirmasaun Adesaun Kompleta

Partisipasaun Timor-Leste nian iha AMMS-8 nu'udar observadór reafirma kompromisu Estadu nian hodi kompleta dalan ba adesaun kompleta iha ASEAN, ne'ebé tuir kalendáriu sei akontese iha finál fulan-Outubru 2025.

Tuir Komunikadu Konjuntu husi AMMS-8, Estadu Membru ASEAN nian simu no hein ho laran-kontentepartisipasaun Timor-Leste nian nu'udar observadór no iha atividade kapasitasaun sira.

ASEAN rekoñese katak desportu sai nu'udar forsa motora ida hodi promove pás, unidade, no dezenvolvimentu sosiál-kulturál. MJDAK komprometidu atu kontinua hametin parseria rejionál hodi hasa'e kualidade no performance atleta Timoroan sira-nian iha nível internasionál.

#MídiaMJDAK