DILI, 24 Jullu 2025 – Ministériu Juventude, Desportu, Arte no Kultura (MJDAK) simu ho laran ksolok Prezidente atuál Konferénsia Ministru Juventude no Desportu Komunidade ba País Lian Portugés (CPLP) nian, Sua Exelénsia Rui Falcão Pinto de Andrade, Ministru Juventude no Desportu husi Repúblika Angola.

Ministru Falcão no nia espoza to'o ona iha Dili ohin loron 24 Jullu 2025, iha tuku 13:00 OTL liuhusi aviaun Aero Dili. Sira mai atu partisipa iha Konferénsia Ministru Juventude no Desportu CPLP nian, ne'ebé sai nu'udar momentu importante ba diskusaun estratéjika.

Foku ba Jogos CPLP no Dezafiu Sira

Konferénsia ne'e sei foka hodi diskute dezafiu sira ne'ebé hasoru iha prosesu hala'o XII Jogos Desportivos da CPLP 2025 iha Timor-Leste. Aleinde ne’e, sei ko'alia mós kona-ba preparasaun ba Jogos CPLP tuir mai ne'ebé sei hala'o iha Brazíl.

Reuniaun boot Ministru sira nian sei hala'o iha loron 27 Jullu 2025, iha Salaun Hotel JL World.

Prezensa Ministru Falcão nian subliña importánsia husi kooperasaun no diálogu entre nasaun CPLP nian, hodi hametin vizaun komún atu dezenvolve juventude no desportu iha komunidade ne'e.

#MídiaMJDAK