DILI, 5 Setembru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin simu vizita kortezia no enkontru serbisu husi delegasaun Asosiasaun Guangzhou, Repúblika Populár Xina, iha Salaun Magna MJDAK, Lecidere.

Enkontru ida-ne'e ho objetivu atu hametin relasaun amizade no buka dalan kolaborasaun inovativu iha área desportu no dezenvolvimentu juventude.

MJDAK Apresenta Potensiál Nasionál

Durante sorumutuk, Ministru Nelyo Isaac Sarmento halo aprezentasaun kona-ba programa prioritáriu sira ne'ebé MJDAK iha, no mós introdús poténsia infraestrutura desportiva ne'ebé Timor-Leste iha, hodi fó baze ba área kooperasaun.

Partisipasaun MJDAK nian ne'e hatudu kompromisu Governu nian atu loke dalan ba kooperasaun internasionál hodi hasa'e kualidade desportu no dezenvolvimentu joven sira.

Vizaun Asosiasaun Guangzhou: Futsál nu'udar Pontu Inísiu

Sra. Mimi Chonque, nu'udar emprezária no reprezentante husi Asosiasaun Guangzhou, hato'o agradesimentu ba oportunidade ne'e. Nia esplika katak asosiasaun ne'e iha esperiénsia barak iha área desportu, liuliu iha jogu futsál, no sira-nia vizita ho intensaun atu hahú parseria.

"Asosiasaun Guangzhou iha vizaun atu ajuda no hametin amizade ho Timor-Leste, liuliu liuhosi desportu. Ami fiar katak liuhosi kolaborasaun, ami bele ajuda dezenvolve joven sira iha área desportu no promove talentu Timoroan sira nian," dehan Sra. Mimi.

Enkontru ne'e hetan partisipasaun mós husi Xefe Gabinete MJDAK, Sr. Fernando da Silva, hodi fó apoiu tékniku no administrativu ba negosiasaun kolaborasaun ne'e. MJDAK espera katak inisiativa kolaborativa ne'e bele fó rezultadu konkrétu iha futuru, liuliu hodi fasilita formasaun ba atleta juventude Timoroan.

#MídiaMJDAK