DILI, 18 Setembru 2025 — Gabinete Inspesaun no Auditória (GIA) husi Ministériu Juventude, Desportu, Arte no Kultura (MJDAK) partisipa iha Reuniaun Reguler Inspetór no Auditór sira husi Administrasaun Públika ba Trimestre Da-toluk 2025. Reuniaun ne'e, ne'ebé ho tema "Analiza no Konsolida ba Estatutu Karreira Inspetór no Auditór sira Hodi Hametin Governasaun no Transparénsia," realiza iha salaun Ministériu Finansas, Aitarak Laran.

Reuniaun ne'e loke ofisiálmente husi Inspetór GIA-MJDAK, João dos Santos, hamutuk ho Reprezentante Komisáriu Funsaun Públika (KFP), Fausto Freitas da Silva.

Hametin Governasaun no Transparénsia

Iha ninia intervensaun, Fausto Freitas da Silva hateten katak objetivu prinsipál husi reuniaun ne'e maka atu diskute no konsolida estatutu karreira inspetór no auditór sira-nian, hodi hametin governasaun no transparénsia iha setór administrasaun públika.

Nia enkorajá inspetór sira hotu atu "brani foti desizaun ba kualker asuntu hodi rezolve problema atu dezenvolve ita-nia rai."

Hasa'e Kualidade Koñesimentu

Inspetór Jerál Ministériu Edukasaun, Francisco de Carvalho, husu ba Governu atu hasa'e kualidade koñesimentu ba inspetór sira, liu-liu iha servisu aprovizionamentu nian. Nia hateten katak ne'e importante tebes atu inspetór sira bele fahe informasaun ho Konsellu Diretór sira iha liña ministeriál sira hotu.

Reuniaun ne'e partisipa husi inspetór sira husi liña ministeriál várius, inklui MJDAK, MESCC, MAPPF, MPIE, MSSI, MPRM, MDRHC, MI, MTA, MCI, PDHJ, SEI, IPE, APC, IPB, Secoop, no CNE.

#MídiaMJDAK